വിമുക്തഭടന്മാരും ആശ്രിതരും നേരിടുന്ന പ്രശ്‌നങ്ങൾ പരിഹരിക്കാൻ പ്രതിജ്ഞാബദ്ധം ! പാങ്ങോട് സൈനിക കേന്ദ്രത്തിൽ മെഗാ വിമുക്തഭട സംഗമം സംഘടിപ്പിച്ചു

തിരുവനന്തപുരം: ദക്ഷിണ കരസേനാ ആസ്ഥാനത്തിന്റെ ആഭിമുഖ്യത്തിൽ തിരുവനന്തപുരം പാങ്ങോട് സൈനിക കേന്ദ്രത്തിൽ വിപുലമായ വിമുക്തഭട സംഗമം സംഘടിപ്പിച്ചു. ദക്ഷിണ ഭാരത് ഏരിയ ചീഫ് ഓഫ് സ്റ്റാഫ് മേജർ ജനറൽ ആർ.എം. ശ്രീനിവാസ് ചടങ്ങ് ഉദ്ഘാടനം ചെയ്തു. രാജ്യത്തിന് വേണ്ടി സേവനമനുഷ്ഠിച്ച ധീര സൈനികരോടുള്ള ആദരവും കൃതജ്ഞതയും പ്രകടിപ്പിക്കുന്നതിനായി സംഘടിപ്പിച്ച ചടങ്ങിൽ പാങ്ങോട് സ്റ്റേഷൻ കമാൻഡർ ബ്രിഗേഡിയർ അനുരാഗ് ഉപാധ്യായ ഉൾപ്പെടെയുള്ള പ്രമുഖ ഉദ്യോഗസ്ഥർ പങ്കെടുത്തു. ഏകദേശം 1240-ഓളം വിമുക്തഭടന്മാരാണ് സംഗമത്തിൽ പങ്കുചേർന്നത്.

വിമുക്തഭടന്മാരുടെയും അവരുടെ ആശ്രിതരുടെയും ക്ഷേമത്തിന് കരസേന പ്രതിജ്ഞാബദ്ധമാണെന്ന് ഉദ്ഘാടന പ്രസംഗത്തിൽ മേജർ ജനറൽ ആർ.എം. ശ്രീനിവാസ് പറഞ്ഞു. ആധുനിക കാലഘട്ടത്തിൽ സൈനികർക്കും വിമുക്തഭടന്മാർക്കുമെതിരെയുള്ള ഇന്റർനെറ്റ് തട്ടിപ്പുകൾ വർധിച്ചുവരുന്ന സാഹചര്യത്തിൽ എല്ലാവരും അതീവ ജാഗ്രത പാലിക്കണമെന്ന് അദ്ദേഹം ഓർമ്മിപ്പിച്ചു. വിമുക്തഭടന്മാർ നേരിടുന്ന വിവിധ പ്രശ്നങ്ങൾക്കും പരാതികൾക്കും അടിയന്തര പരിഹാരം കാണാൻ പ്രത്യേക സംവിധാനങ്ങൾ സജ്ജമാണെന്നും അദ്ദേഹം കൂട്ടിച്ചേർത്തു.

കൂടാതെ രാജ്യത്തുടനീളമുള്ള 18 റെക്കോർഡ് ഓഫീസുകളിൽ നിന്നുള്ള ഉദ്യോഗസ്ഥർമാരും, ഇ.സി.എച്ച്.എസ് സെൽ, കരസേനാ, വ്യോമസേനാ, നാവികസേനാ എന്നീ വിഭാഗങ്ങളിലെ വെറ്ററൻ സെൽ ഉദ്യോഗസ്ഥർ, സ്പർശ്, കാൻ്റീൻ, സൈനിക വെൽഫെയർ ബോർഡ് എന്നിവയിലെ ഉദ്യോഗസ്ഥരും പരാതികളും, പെൻഷനുമായി ബന്ധപ്പെട്ട പ്രശ്നങ്ങൾ പരിഹരിക്കാൻ ഇവിടെ സന്നിഹിതരായിരുന്നു കൂടാതെ, കണ്ണ്, ദന്ത, കേൾവി പരിശോധന കൗണ്ടറുകൾ ഉൾപ്പെടെ നിരവധി പരിപാടികളും സംഘടിപ്പിച്ചു.
ഇന്ത്യൻ സൈന്യത്തിന്റെ വിമുക്തഭടന്മാർക്കൊപ്പം നിൽക്കാനുള്ള പ്രതിബദ്ധത വീണ്ടും ഉറപ്പിച്ചുകൊണ്ട് മേള സമാപിച്ചു.