ഹേമകമ്മിറ്റി റിപ്പോർട്ട് നാലരവർഷം പുറത്തുവിടാതിരുന്ന ഇടതുപക്ഷ വിപ്ലവ സർക്കാറിനഭിവാദ്യങ്ങൾ! സംസ്ഥാന സർക്കാരിനെതിരെ കുറിപ്പുമായി നടൻ ജോയ് മാത്യു

മലയാള സിനിമാ മേഖലയിൽ സ്ത്രീകൾ അഭിമുഖീകരിക്കുന്ന പ്രശ്നങ്ങളുമായി ബന്ധപ്പെട്ട് പുറത്തു വന്ന ജസ്റ്റിസ് ഹേമ കമ്മിറ്റി റിപ്പോർട്ട് വലിയ നടുക്കമാണ് ഉണ്ടാക്കിയിരിക്കുന്നത്. സ്ത്രീകളെ ലൈംഗിക ഉപകരണമായി മാത്രം ഉപയോഗിക്കുന്നുവെന്നും വഴങ്ങാത്ത വരെ അവസരം നൽകാതെ തഴയുന്നുവെന്നും പ്രമുഖരുടെ കീഴിൽ വലിയൊരു മാഫിയ തന്നെ ഇതിനായി പ്രവർത്തിക്കുന്നു എന്നുമുള്ള കണ്ടെത്തൽ കേരളത്തിന്റെ മനസാക്ഷി ഞെട്ടിച്ചതാണ്. അതേസമയം ജസ്റ്റിസ് ഹേമ കമ്മിറ്റി റിപ്പോർട്ടിലെ ചില പ്രധാന നിരീക്ഷണങ്ങളും ശുപാർശകളും ഇപ്പോഴും പുറത്തുവിട്ടിട്ടില്ല. തൊഴിലിടങ്ങളിലെ ലൈംഗിക പീഡനങ്ങളിൽ സുപ്രീം കോടതിയുടെ നിർദേശവും കേന്ദ്ര സർക്കാരിന്റെ ഉത്തരവും പാലിച്ച് കർശന നടപടിയെടുക്കണമെന്നു കമ്മിറ്റി നിർദേശിച്ചിരുന്നു. സമൂഹമാദ്ധ്യമങ്ങളിലൂടെയും മറ്റും നടന്മാരുടെ ഫാൻ ക്ലബ്ബുകൾ നടിമാരെ മോശമായി ചിത്രീകരിക്കുന്നതിനെതിരെ ഐപിസി 354 അനുസരിച്ച് കേസെടുക്കണമെന്നും ശുപാർശയുണ്ട്. കമ്മിറ്റിയുടെ നിരീക്ഷണങ്ങൾ അടങ്ങുന്ന ഏതാനും പേജ് ഒഴിവാക്കിയാണ് വിവരാവകാശ അപേക്ഷകർക്കു നൽകിയത്.

റിപ്പോർട്ട് സമർപ്പിച്ച് നാലര വർഷത്തോളം റിപ്പോർട്ട് വെളിച്ചം കണ്ടില്ല. ഗുരുതരമായ കണ്ടെത്തലുകൾ ഉള്ള റിപ്പോർട്ടിന്മേൽ യാതൊരു നിയമനടപടിയും എടുക്കാൻ സർക്കാർ തയ്യാറാകാത്തത് വലിയ വിമർശനമാണ് സമൂഹത്തിൽ ഉയർത്തിയത്.ഇത്രയും കാലം ഗുരുതരമായ ഈ റിപ്പോർട്ട് പുറത്തുവിടാതെ പിടിച്ചുവച്ച സംസ്ഥാന സർക്കാരിനെ രൂക്ഷമായി വിമർശിച്ചു മുന്നോട്ടു വന്നിരിക്കുകയാണ് നടൻ ജോയ് മാത്യു.
ഹേമകമ്മിറ്റി റിപ്പോർട്ട് നാലരവർഷം പുറത്തുവിടാതിരുന്ന ഇടതുപക്ഷ വിപ്ലവ സർക്കാറിനഭിവാദ്യങ്ങളെന്നാണ് അദ്ദേഹം സമൂഹമാദ്ധ്യമത്തിൽ കുറിച്ചത്.ഒപ്പം റിപ്പോർട്ട് പുറത്തുകൊണ്ടുവരാൻ പ്രവർത്തിച്ചവർക്കും അദ്ദേഹം അഭിവാദ്യങ്ങൾ അർപ്പിച്ചു. ചിരിയും ചിന്തയും ഉണർത്തുന്ന അദ്ദേഹത്തിന്റെ പോസ്റ്റ് ഇപ്പോൾ വൈറൽ ആവുകയാണ്

പോസ്റ്റിന്റെ പൂർണ്ണരൂപം:

ഹേമകമ്മിറ്റി റിപ്പോർട്ട് നാലരവർഷം പുറത്തുവിടാതിരുന്ന ഇടതുപക്ഷ വിപ്ലവ സർക്കാറിന്നഭിവാദ്യങ്ങൾ;
റിപ്പോർട്ട് പുറത്തുവിടാൻ വേണ്ടി പോരാടിയവർക്കും അഭിവാദ്യങ്ങൾ