നരേന്ദ്രമോദി ഇന്നും കർണ്ണാടകയിൽ; ബിജെപിയുടെ പ്രചാരണത്തിന് ശക്തിയേറി; ബജ്രംഗദൾ നിരോധന പ്രഖ്യാപനം അബദ്ധമായെന്ന് പാർട്ടിക്കുള്ളിൽ മുറുമുറുപ്പ്; അനുകൂല സർവേഫലങ്ങൾക്കിടയിൽ കോൺഗ്രസ് പടിക്കൽ കലമുടക്കുന്നുവോ ?

ദക്ഷിണ കന്നഡ: പ്രധാനമന്ത്രി നരേന്ദ്രമോദിയുടെ സാന്നിധ്യം ഉണ്ടായതോടെ കർണ്ണാടകയിൽ ബിജെപിയുടെ പ്രചാരണങ്ങൾക്ക് ശക്തിയേറി. രണ്ടര ലക്ഷത്തോളം പേർ പങ്കെടുക്കുന്ന റാലി ഇന്ന് മുൽകിയിൽ നടക്കുകയാണ്. ദക്ഷിണ കന്നടയിലെ 13 നിയോജകമണ്ഡലത്തിൽ നിന്നുള്ള പ്രവർത്തകരാണ് റാലിയിൽ പങ്കെടുക്കുക. ഇതോടെ പിന്നിലാണെന്ന സൂചനകൾ നൽകിയ സർവേ ഫലങ്ങളെ മറികടക്കാനാണ് ബിജെപി ശ്രമിക്കുന്നത്. അഭിപ്രായ സർവ്വേകൾ നൽകുന്നത് ഇഞ്ചോടിഞ്ച് പോരാട്ടത്തിന്റെ സൂചന തന്നെയാണ്. എന്നാൽ അവസാനനിമിഷം അമിത ആത്മവിശ്വാസത്താൽ അബദ്ധം കാണിക്കുകയാണ് കോൺഗ്രസ് എന്ന വിലയിരുത്തലുകളുമുണ്ട്. മുസ്ലിം സംവരണം തിരികെ കൊണ്ടുവരുമെന്നും ബജ്‌റംഗ്‌ദള്ളിനെ നിരോധിക്കുമെന്നുമുള്ള പ്രകടനപത്രികയിലെ പ്രഖ്യാപനങ്ങൾ കോൺഗ്രസിന് തിരിച്ചടിയായേക്കും

നിരോധന പ്രഖ്യാപനം ഇതിനോടകം തന്നെ ബിജെപി രാഷ്ട്രീയ ആയുധമാക്കിയിട്ടുണ്ട്. പ്രധാനമന്ത്രി നരേന്ദ്രമോദി തന്നെ ഇക്കാര്യം റാലികളിൽ എടുത്തുപറഞ്ഞിരുന്നു. വ്യക്തമായ മുസ്ലിം പ്രീണന നയമാണ് കോൺഗ്രസ് പയറ്റുന്നതെന്നും ഭൂരിപക്ഷ ഏകീകരണത്തിന് അത് വഴിയൊരുക്കുമെന്നും കണക്കുകൂട്ടിയാണ് ബിജെപി നീക്കങ്ങൾ. ഏതായാലും അവസാന ലാപ്പിൽ ആരുടെ തന്ത്രങ്ങൾ വിജയിക്കുന്നുവോ അവർക്ക് ഭരണം പിടിക്കാനാകും എന്നാണ് രാഷ്ട്രീയ നിരീക്ഷകരുടെ വിലയിരുത്തൽ.