ദുരിതപ്പെയ്ത്തില്‍ റോഡെല്ലാം തോടായി, പന്തലിലേക്ക് ദമ്പതികള്‍ എത്തിയത് സാഹസികമായി ചെമ്പില്‍ കയറി; വൈറലായി ആലപ്പുഴയിലെ നവദമ്പതികൾ

ആലപ്പുഴ: ആലപ്പുഴയിൽ വെള്ളക്കെട്ടില്‍ വീഴാതെ കല്ല്യാണ പന്തലിലേക്ക് ദമ്പതികള്‍ (Marriage) എത്തിയത് സാഹസികമായി ചെമ്പില്‍ കയറി. വെള്ളക്കെട്ടിനിടയിലും വിവാഹം നടത്തിക്കൊണ്ട് സമൂഹമാധ്യമങ്ങളിൽ ശ്രദ്ധ നേടുകയാണ് ആലപ്പുഴയിലെ നവദമ്പതിമാർ. കുട്ടനാട് മേഖലയിലെ ഐശ്വര്യരയ്ക്കും രാഹുലിനുമാണ് വിവാഹതിരാവാനായി ചെമ്പില്‍ കയറേണ്ടി വന്നത്. പ്രദേശത്ത് വെള്ളക്കെട്ട് രൂക്ഷമായതോടെ ബന്ധുക്കളാണ് വധൂവരന്മാര്‍ക്കായി ചെമ്പ് ഒരുക്കിയത്.

എന്തായാലും ചെമ്പില്‍ കയറി കൃത്യസമയത്ത് തന്നെ ക്ഷേത്രത്തില്‍ എത്തി മുഹൂര്‍ത്തത്തില്‍ വിവാഹിതരാവാന്‍ ഇരുവര്‍ക്കുമായി. കല്ല്യാണത്തിനായി ചെമ്പിനകത്ത് വരേണ്ടിവരുമെന്ന് പ്രതീക്ഷിച്ചിരുന്നില്ലെന്നും ഒട്ടും പ്രതീക്ഷിക്കാത്ത രീതിയിലായി കല്ല്യാണമെന്നും വധു ഐശ്വര്യ ചിരിയോടെ പറഞ്ഞു.

മഹാപ്രളയത്തെ നിസാരമാക്കിക്കൊണ്ട് ‘മംഗല്യം’

കേരളത്തിലെ മഹാപ്രളയത്തെ വരെ നിസാരമാക്കിക്കൊണ്ടായിരുന്നു ഇരുവരുടെയും വിവാഹം. തലവടിയിലെ പനയന്നൂർ കാവ് ക്ഷേത്രത്തിൽ വച്ചാണ് ഇവരുടെ വിവാഹം നടന്നത്. നേരത്തെ തീയ്യതി നിശ്ചയിച്ചതിനാൽ അത് മാറ്റിവയ് ക്കാൻ സാധിക്കാതെ വന്നതോടെയാണ് എല്ലാ പ്രതിസന്ധികളെയും തരണം ചെയ്തുകൊണ്ട് വിവാഹിതരാകാൻ വധൂവരന്മാരും തീരുമാനിച്ചത്. ക്ഷേത്രത്തിൽ മുട്ട് വരെ വെള്ളം ഉണ്ടായിരുന്നതിനാൽ ഇവർക്ക് നടന്നു വരാൻ സാധിച്ചില്ല. തുടർന്ന് രണ്ട് പേർക്ക് ഇരിക്കാൻ പാകത്തിലുള്ള വലിയ ചെമ്പിൽ ഇരുവരെയും ഇരുത്തിയാണ് മണ്ഡപത്തിൽ എത്തിച്ചത്. അടുത്ത ബന്ധുക്കളെ മാത്രം പങ്കെടുപ്പിച്ചുകൊണ്ടാണ് വിവാഹം നടത്തിയത്. തുടർന്ന് വിവാഹത്തിന് ശേഷവും നവദമ്പതികൾ ചെമ്പിലിരുന്ന് യാത്ര തിരിച്ചു. മൂന്ന് പേർ ചേർന്ന് ഇവരെ ചെമ്പിലിരുത്തി കൊണ്ടുപോയി. ചെമ്പിലിരുന്ന് തന്നെ ഇവർ ക്ഷേത്രത്തിൽ ദർശനവും നടത്തി.