സിപിഒ ദിവ്യശ്രീയുടെ കൊലപാതകം: ഭർത്താവ് രാജേഷിന് ട്രിപ്പിൾ ജീവപര്യന്തം ; അപൂർവ വിധി തലശ്ശേരി പ്രിൻസിപ്പൽ സെഷൻസ് കോടതിയുടേത്

കേരളത്തെ നടുക്കിയ വനിതാ സിവിൽ പോലീസ് ഓഫീസർ ദിവ്യശ്രീ വധക്കേസിൽ ഭർത്താവ് രാജേഷിന് മൂന്ന് ജീവപര്യന്തം ശിക്ഷ വിധിച്ചു. കൊലപാതകം, ദിവ്യശ്രീയുടെ അച്ഛനെ കൊലപ്പെടുത്താൻ ശ്രമിച്ചു എന്നിങ്ങനെ മൂന്ന് കുറ്റങ്ങളിലാണ് അപൂർവ വിധി. രണ്ടുലക്ഷം രൂപ പിഴയും തലശ്ശേരി പ്രിൻസിപ്പൽ സെഷൻസ് കോടതി വിധിച്ചു.. കൊലപാതകം, കൊലപാതക ശ്രമം, അതിക്രമിച്ചു കയറൽ, തെളിവ് നശിപ്പിക്കൽ എന്നീ ഗുരുതരമായ വകുപ്പുകൾ പ്രകാരമുള്ള കുറ്റങ്ങൾ കോടതി ശരിവെച്ചു.

2024 നവംബർ 21-ന് വൈകുന്നേരം ദിവ്യശ്രീയുടെ വീട്ടിലെത്തിയാണ് രാജേഷ് ഈ ക്രൂരകൃത്യം നടത്തിയത്. വീടിന്റെ വരാന്തയിൽ പെട്രോൾ ഒഴിച്ച ശേഷം ദിവ്യശ്രീയെ കൊടുവാൾ ഉപയോഗിച്ച് തുരുതുരെ വെട്ടുകയായിരുന്നു. അക്രമത്തിൽ നിന്ന് രക്ഷപ്പെടാൻ പുറത്തേക്ക് ഓടിയ ദിവ്യശ്രീയെ ഗേറ്റിന് സമീപം വെച്ച് പിന്തുടർന്ന് വീണ്ടും വെട്ടി പരിക്കേൽപ്പിച്ചു. മകളെ രക്ഷിക്കാൻ ശ്രമിച്ച പിതാവ് കെ. വാസുവിനും ആക്രമണത്തിൽ ഗുരുതരമായി പരിക്കേറ്റിരുന്നു.

കൊലപാതകത്തിന് ശേഷം രക്ഷപ്പെട്ട പ്രതിയെ ബാറിൽ മദ്യപിക്കുന്നതിനിടെയാണ് പോലീസ് പിടികൂടിയത്. ബൈക്ക് ഉപേക്ഷിച്ചും പല വാഹനങ്ങൾ മാറി കയറിയും പോലീസിനെ വെട്ടിക്കാൻ ശ്രമിച്ച പ്രതി, കൊലയ്ക്ക് ഉപയോഗിച്ച ആയുധം പുഴയിൽ എറിഞ്ഞിരുന്നു. പിന്നീട് പോലീസ് നടത്തിയ പരിശോധനയിൽ പുഴയിൽ നിന്ന് കൊടുവാൾ കണ്ടെടുക്കുകയുണ്ടായി. കൃത്യമായ ആസൂത്രണത്തോടെ നടത്തിയ കൊലപാതകമാണെന്ന് തെളിയിക്കുന്നതിൽ പ്രോസിക്യൂഷൻ വിജയിച്ചു.