ക്രൈം നന്ദകുമാർ തന്റെ ജീവിതം തകർത്തു;കൊച്ചി നഗരത്തിൽ ആത്മഹത്യാശ്രമവുമായി ക്രൈം വാരികയിലെ മുൻജീവനക്കാരി

കൊച്ചി : ക്രൈം വാരികയുടെ എഡിറ്റർ ടി.പി.നന്ദകുമാർ തന്റെ ജീവിതം തകർത്തെന്ന് ആരോപണവുമായി ആത്മഹത്യാശ്രമം നടത്തിയ യുവതി നഗര മദ്ധ്യത്തിൽ പരിഭ്രാന്തി പടർത്തി. ശരീരത്തിൽ പെട്രോൾ ഒഴിച്ച് ആത്മഹത്യയ്ക്ക് ശ്രമിച്ച യുവതിയെ നാട്ടുകാർ പണിപ്പെട്ടാണ് തടഞ്ഞത്. ക്രൈം നന്ദകുമാറിന്റെ ഓഫിസിലെ മുൻ ജീവനക്കാരിയാണ് ഇവർ. ആത്മഹത്യ ശ്രമത്തിനു പിന്നാലെ ഇവരെ നാട്ടുകാരും പൊലീസും ചേർന്ന് സമീപത്തെ ആശുപത്രിയിൽ പ്രവേശിപ്പിച്ചു.

ഇന്നു രാവിലെ 11.30ന് ദേശാഭിമാനി ജംഗ്ഷനിലായിരുന്നു സംഭവം. കയ്യിൽ കരുതിയിരുന്ന പെട്രോൾ ദേഹത്തൊഴിച്ച് തീകൊളുത്താനായിരുന്നു യുവതിയുടെ ശ്രമം. തന്നെ കുറിച്ചുള്ള വാർത്ത ക്രൈം നന്ദകുമാർ അദ്ദേഹത്തിന്റെ ചാനലിൽ നൽകിയെന്നും മകളുടെ ദൃശ്യങ്ങൾ ഉൾപ്പെടെ പകർത്തി പ്രചരിപ്പിക്കുമെന്ന് ഭീഷണിപ്പെടുത്തിയെന്നും ആരോപിച്ച് യുവതി നേരത്തേ പൊലീസിൽ പരാതി നൽകിയിരുന്നു.