“എല്ലാ മാഫിയ പപ്പുമാരും കിംഗ് ഖാന്റെ മകന് പിന്തുണയുമായി വന്നിട്ടുണ്ട്”; ആര്യൻ ഖാനെ പിന്തുണയ്ക്കുന്ന ബോളിവുഡ് താരങ്ങൾക്കെതിരെ തുറന്നടിച്ച് നടി കങ്കണ റണാവത്ത്

മുംബൈ: ലഹരിമരുന്ന് കേസില്‍ കസ്റ്റഡിയിലായ ആര്യൻ ഖാനെ ( Aryan Khan Arrest) പിന്തുണയ്ക്കുന്ന ബോളിവുഡ് താരങ്ങൾക്കെതിരെ തുറന്നടിച്ച് നടി കങ്കണ റണാവത്ത്. ബോളിവുഡ് സൂപ്പർ താരം ഹൃതിക് റോഷന്‍ രംഗത്തുവന്നതിന്‍റെ തൊട്ടു പിന്നാലെയായിരുന്നു കങ്കണയുടെ പ്രതികരണം. “ഇപ്പോഴത്തെ പ്രതിസന്ധികള്‍ നല്ല ഭാവിയിലേക്കുള്ള വഴികാട്ടികളാണെന്നും അതിനെ സ്വീകരിക്കണമെന്നും പറഞ്ഞായിരുന്നു ഋത്വിക് ഇന്‍സ്റ്റഗ്രാം അക്കൗണ്ടിലൂടെ ആര്യന് കത്ത് എഴുതിയത്. ഇതിനെ രൂക്ഷമായി വിമർശിച്ചുകൊണ്ടാണ് കങ്കണ രംഗത്തെത്തിയത്.

നടിയുടെ വാക്കുകൾ ഇങ്ങനെ:

“എല്ലാ മാഫിയ പപ്പുമാരും ആര്യന് പിന്തുണയുമായി വന്നിട്ടുണ്ട്. എല്ലാവരും തെറ്റും ചെയ്യാറുണ്ട്. പക്ഷേ തെറ്റിനെ മഹത്വവത്കരിക്കരുത്. ഓരോരുത്തരുടേയും കർമങ്ങൾ സൃഷ്ടിക്കുന്ന പ്രത്യാഘാതം എന്താണെന്ന് തിരിച്ചറിയാന്‍ ഈ നടപടി ആര്യനെ സഹായിക്കട്ടെ. കുറച്ച് കൂടി നല്ല വ്യക്തിയായി പരിണമിക്കാന്‍ ആര്യന് സാധിക്കട്ടെ. ദുര്‍ബലനായ ഒരാളെ കുറിച്ച് അപവാദങ്ങള്‍ പ്രചരിപ്പിക്കരുത്. എന്നാല്‍ ആര്യൻ ചെയ്തതില്‍ യാതൊരു തെറ്റുമില്ലെന്ന് തോന്നിപ്പിക്കുന്ന തരത്തില്‍ കുറ്റവാളികൽ പിന്തുണക്കുന്നു” എന്നാണ് കങ്കണ ( Kangana Ranaut) കുറിച്ചിരിക്കുന്നത്.

എന്നാൽ ആര്യൻ ഖാന്റെ അറസ്റ്റിന് പിന്നാലെ ഒരു ഇടവേളക്ക് ശേഷം വീണ്ടും ബോളിവുഡിൽ ലഹരിമരുന്ന് വിഷയം ചർച്ചയായിരിക്കുകയാണ്. നിരവധി പേരാണ് വിഷയത്തിൽ പ്രതികരണവുമായി ഇതിനോടകം രംഗത്തെത്തിയിരിക്കുന്നത്. ഋത്വിക് റോഷനെ കൂടാതെ സല്‍മാന്‍ ഖാന്‍, ആമീര്‍ ഖാന്‍, സുനില്‍ ഷെട്ടി എന്നിവരും ആര്യന് പിന്തുണ അറിയിച്ച് രംഗത്തെത്തിയിരുന്നു. സല്‍മാന്‍ഖാന്‍ ഷാരൂഖ് ഖാന്‍റെ വീട്ടിലെത്തിയാണ് പിന്തുണ അറിയിച്ചത്. അതേസമയം ആര്യൻ ഖാൻ ഇടക്കാല ജാമ്യപേക്ഷ ഇന്ന് സമർപ്പിച്ചേക്കും. പ്രത്യേക എൻഡിപിഎസ് കോടതിയിലാണ് ജാമ്യപേക്ഷ സമർപ്പിക്കുക. എന്നാൽ ജാമ്യത്തെ ശക്തമായി എതിർക്കുമെന്ന് എൻസിബി വ്യക്തമാക്കിയിട്ടുണ്ട്.