കമ്മ്യൂണിസ്റ്റ് ഭീകരരെക്കുറിച്ച് നിർണ്ണായക വിവരം കൈമാറി ! ഗ്രാമീണന് 86 ലക്ഷംരൂപ പാരിതോഷികം പ്രഖ്യാപിച്ച് മഹാരാഷ്ട്ര പോലീസ് ; ഏറ്റുമുട്ടലിൽ സുരക്ഷാ സേന വധിച്ചത് 12 ഭീകരരെ

മുംബൈ : ഗഡ്ചിറോളിയിലെ കമ്മ്യൂണിസ്റ്റ് ഭീകര വിരുദ്ധ നടപടിക്ക് സഹായകമായ സുപ്രധാന വിവരം സുരക്ഷാസേനയ്ക്ക് കൈമാറിയ ഗോത്രവര്‍ഗ ഗ്രാമീണന് 86 ലക്ഷം രൂപ പാരിതോഷികം പ്രഖ്യാപിച്ച് മഹാരാഷ്ട്ര പോലീസ്. സുരക്ഷാ കാരണങ്ങളുള്ളതിനാൽ ഗ്രാമീണന്റെ പേര് വെളിപ്പെടുത്തില്ലെന്നും പണം ഉടന്‍ കൈമാറുമെന്നും ദേശീയ മാദ്ധ്യമങ്ങൾ റിപ്പോർട്ട് ചെയ്തു.

മഹാരാഷ്ട്ര-ഛത്തീസ്ഗഢ് അതിര്‍ത്തിയിലെ ഗഡ്ചിറോളി ജില്ലയിലെ വണ്ടോലിയില്‍ ഇക്കഴിഞ്ഞ ബുധനാഴ്ച നടന്ന ആറ് മണിക്കൂറോളം നീണ്ട ഏറ്റുമുട്ടലില്‍ വാണ്ടഡ് ലിസ്റ്റില്‍പ്പെട്ട, പീപ്പിള്‍സ് ലിബറേഷന്‍ ഗറില്ല ആര്‍മി അംഗങ്ങളായ 12 കമ്മ്യൂണിസ്റ്റ് ഭീകരരെയാണ് സുരക്ഷാസേന വധിച്ചത്. കൊല്ലപ്പെട്ടവരിൽ യോഗേഷ് തുലാവി, വിശാല്‍ അത്‌റാം, പ്രമോദ് കച്‌ലാമി തുടങ്ങിയ ഭീകരന്മാരും ഉൾപ്പെടുന്നു. ഇവരുടെ മൃതദേഹങ്ങള്‍ ഗഡ്ചിറോളി പോലീസ് ആസ്ഥാനത്ത് വ്യാഴാഴ്ച എത്തിച്ചിരുന്നു. ഓപ്പറേഷനിൽ നടപടിയില്‍ പങ്കെടുത്ത കമാന്‍ഡോകള്‍ക്ക് 51 ലക്ഷം രൂപ പാരിതോഷികവും ആഭ്യന്തരമന്ത്രി ദേവേന്ദ്ര ഫഡ്‌നാവിസ് പ്രഖ്യാപിച്ചിട്ടുണ്ട്.

വണ്ടോലി വനമേഖലയില്‍ ചുരുങ്ങിയത് 12 ഓപ്പറേഷനുകളെങ്കിലും നടത്തിയിട്ടുണ്ടെന്നും എന്നാല്‍ അപ്പോഴൊക്കെയും മാവോവാദി നേതാക്കള്‍ തന്ത്രപരമായി രക്ഷപ്പെടുകയായിരുന്നെന്ന് മഹാരാഷ്ട്ര ആന്റി നക്‌സല്‍ ഓപ്പറേഷന്‍സ് സെല്‍ മേധാവി ഐ.ജി. സന്ദീപ് പാട്ടീല്‍ പറഞ്ഞു. എന്നാല്‍ ഇക്കുറി ദുഷ്‌കരമായ സാഹചര്യമായിട്ടും കമാന്‍ഡോകളുടെ ധീരതമൂലം മാവോവാദികളെ ഇല്ലാതാക്കാന്‍ കഴിഞ്ഞതായി അദ്ദേഹം വ്യക്തമാക്കി.