ദളിത് യുവാവിന് പോലീസ് മർദ്ദനം ; കള്ളക്കേസിൽ കുടുക്കി പോലീസ് വേട്ട ഇപ്പോഴും തുടരുന്നതായി യുവാവ്

കൊല്ലം: പരാതി നൽകിയതിന്‍റെ രസീത് ആവശ്യപ്പെട്ട ദളിത് യുവാവിനെ മര്‍‍ദ്ദിച്ചതിന് പിന്നാലെ പോലീസെടുത്ത കേസിന്റെ കുറ്റപത്രം കോടതിയിൽ സമര്‍പ്പിച്ചു. യുവാവിനെതിരെയുള്ള കേസ് കെട്ടിച്ചമച്ചതാണെന്ന് ദക്ഷിണമേഖല ഐജി കണ്ടെത്തിയിട്ടും പോലീസ് കേസിന്റെ നടപടികളുമായി മുന്നോട്ട് പോവുകയാണ്. മര്‍ദനമേറ്റ രാജീവ് മുഖ്യമന്ത്രിക്കും ഡിജിപിക്കും സങ്കട ഹര്‍ജി കൊടുത്തിരുന്നു. അതിനു കിട്ടിയ മറുപടിയിലാണ് യുവാവിനെതിരായ കള്ളക്കേസിൽ പോലീസ് മുന്നോട്ടു പോകുന്ന കാര്യമറിഞ്ഞത്. പോലീസിന്റെ ഔദ്യോഗിക കൃത്യ നിര്‍വ്വഹണം തടസപ്പെടുത്തിയെന്ന കേസിൽ കഴിഞ്ഞ സെപ്റ്റംബറിൽ പോലീസ് പുനലൂർ കോടതിയിൽ കുറ്റപത്രം സമര്‍പ്പിച്ചിരുന്നു.

2021 ഒക്ടോബറിൽ ദക്ഷിണ മേഖല ഐജി ഹർഷിത അട്ടല്ലൂരി രാജീവിനെതിരെ പോലീസ് എടുത്ത കേസുകൾ വ്യാജമാണെന്ന് കണ്ടെത്തിയതാണ്. അതിനു പിന്നാലെ ഇൻസ്പെക്ടർ വിശ്വംഭരനെ സസ്പെന്‍റ് ചെയ്തിരുന്നു. തെറ്റ് ചെയ്തിട്ടില്ലെന്ന് ബോധ്യമായിട്ടും പോലീസ് വേട്ട ഇപ്പോഴും അവസാനിപ്പിച്ചിട്ടില്ലെന്ന് രാജീവ് പറയുന്നു . വീട് അതിക്രമിച്ച് കയറിയെന്ന രാജീവിനെതിരായ രണ്ടാമത്തെ കേസും വ്യാജമാണെന്ന് നേരെത്തെ കണ്ടത്തിയിരുന്നു. ഇത് റദ്ദാക്കാനുള്ള റിപ്പോര്‍ട്ട് കോടതിയിൽ നൽകിയിട്ടുണ്ട് . പോലീസിൽ നിന്നും നീതി ലഭിക്കില്ലെന്നും കോടതിയിൽ തന്‍റെ നിരപരാധിത്വം തെളിയിക്കുമെന്നും രാജീവ് പറഞ്ഞു