ശാസ്താംപൂവം ആദിവാസി കോളനിയിൽ നിന്ന് കാണാതായ കുട്ടികളുടെ മരണം ! മൃതദേഹങ്ങൾ പോസ്റ്റുമോർട്ടം നടപടികൾക്ക് ശേഷം സംസ്കാരത്തിനായി ഊരിലേക്കു കൊണ്ടുപോയി

തൃശ്ശൂര്‍ : ശാസ്താംപൂവം കാടർ കോളനിയിൽനിന്ന് കാണാതായ എട്ടുവയസ്സുകാരൻ അരുൺകുമാറിന്റെ മൃതദേഹത്തിന് അഞ്ചു ദിവസം പഴക്കവും സജിക്കുട്ടന്റെ മൃതദേഹത്തിനു മൂന്നുദിവസത്തെ പഴക്കവുമുണ്ടെന്ന് പ്രാഥമിക നിഗമനം. പോസ്റ്റുമോർട്ടം നടപടികൾക്ക് ശേഷം മൃതദേഹങ്ങൾ സംസ്കാരത്തിനായി ഊരിലേക്കു കൊണ്ടുപോയി.

മാർച്ച് രണ്ടാം തീയതിയാണ് കാടർ വീട്ടിൽ കുട്ടന്റെ മകൻ സജി കുട്ടൻ (15), രാജശേഖരന്റെ മകൻ അരുൺ കുമാർ (8) എന്നിവരെ ഉൾവനത്തിൽ കാണാതായത്. . വനംവകുപ്പ് ഉദ്യോഗസ്ഥരും പോലീസും സംയുക്തമായി നടത്തിയ പരിശോധനയിലാണ് കോളനിയ്ക്കടുത്തുള്ള പാറയുടെ സമീപത്തു നിന്നാണ് മൃതദേഹങ്ങൾ ഇന്നലെ കണ്ടെത്തിയത്. ഈ മാസം രണ്ടാം തീയതി പകൽ 10 മുതലാണ് കുട്ടികളെ കാണാതായത്. അരുൺ കുമാറിന്റെ മൃതദേഹമാണ് ആദ്യം കണ്ടെത്തിയത്. പിന്നാലെ സജി കുട്ടന്റെയും മൃതദേഹം കണ്ടെത്തി.

കട്ടികൾ പോകാനിടയുള്ള സ്ഥലങ്ങളിൽ നടത്തിയ അന്വേഷണം ഫലം കാണാത്തതിനെത്തുടർന്ന് കോളനി നിവാസികൾ വെള്ളിയാഴ്ച വെള്ളിക്കുളങ്ങര പൊലീസിൽ പരാതി നൽകിയിരുന്നു. വെള്ളിക്കുളങ്ങര പോലീസിന്റെയും, പരിയാരം, വെള്ളിക്കുളങ്ങര ഫോറസ്റ്റ് റേഞ്ച് ഓഫിസിലെ ജീവനക്കാരുടെയും നാട്ടുകാരുടെയും നേതൃത്വത്തിലായിരുന്നു കുട്ടികൾക്കായി തിരച്ചിൽ നടത്തിയത്.