കൊച്ചിയിലെ മോഡലുകളുടെ അപകട മരണം: കുറ്റപത്രം ഇന്ന് സമർപ്പിക്കും

കൊച്ചി:കൊച്ചിയിലെ മോഡലുകളുടെ (Models Death) അപകട മരണത്തില്‍ കുറ്റപത്രം ഇന്ന് സമർപ്പിക്കും. ദുരുദ്ദേശത്തോടെ ഹോട്ടലിൽ തങ്ങാൻ റോയിയും,സൈജുവും മോഡലുകളെ നിർബന്ധിച്ചുവെന്നും കുറ്റപത്രത്തിലുണ്ട്. സൈജു തങ്കച്ചൻ അമിത വേഗത്തിൽ കാറിൽ പിന്തുടർന്നതാണ് അപകടത്തിന് ഇടയാക്കിയതെന്നാണ് പൊലീസിന്റെ കണ്ടത്തൽ. അമിതമായി മദ്യപിച്ച് വാഹനം ഓടിച്ചതിന് അബ്ദുൾ റഹ്‌മാനെതിരെയും കേസെടുത്തിട്ടുണ്ട്.

കഴിഞ്ഞ ഒക്ടോബര്‍ 31-ന് രാത്രി നടന്ന പാര്‍ട്ടി കഴിഞ്ഞ് മടങ്ങുന്നതിനിടെയാണ് അന്‍സി കബീര്‍, അഞ്ജന ഷാജന്‍, ആഷിഖ്, അബ്ദുൽ റഹ്മാന്‍ എന്നിവര്‍ സഞ്ചരിച്ച കാര്‍ അപകടത്തില്‍പ്പെട്ടത്. അന്‍സി കബീറും അഞ്ജന ഷാജനും തല്‍ക്ഷണം മരിച്ചു. ചികിത്സയിലായിരുന്ന ആഷിഖ് ദിവസങ്ങൾക്ക് മുൻപ് മരിച്ചു. കാര്‍ ഓടിച്ചിരുന്ന അബ്ദുൽ റഹ്മാനെ പോലീസ് പിന്നീട് അറസ്റ്റു ചെയ്തിരുന്നു. രാത്രി വൈകിയും മദ്യം വിറ്റെന്ന് കണ്ടെത്തിയതിനെ തുടര്‍ന്ന് പാര്‍ട്ടി നടന്ന ഹോട്ടല്‍ എക്‌സൈസ് അധികൃതര്‍ പൂട്ടിക്കുകയും ചെയ്തിരുന്നു.