അമേരിക്കയിലേക്ക് എത്തിനോക്കിയ ചാര ബലൂൺ ഇനി ചൈന കാണില്ല!!മിസൈലുപയോഗിച്ച് തകർത്ത ചാരബലൂണിന്റെ അവശിഷ്ടങ്ങൾ,ചൈനയ്ക്ക് കൈമാറില്ലെന്ന് ആവർത്തിച്ച് അമേരിക്ക

വാഷിങ്ടൻ : അമേരിക്കൻ വ്യമോതിർത്തി ലംഘിച്ചതിനെ തുടർന്ന് ചാരപ്രവർത്തി നടത്തിയെന്നാരോപിച്ച് മിസൈലുപയോഗിച്ച് തകർത്ത ചൈനീസ് ബലൂണിന്റെ അവശിഷ്ട്ങ്ങൾ ചൈനയ്ക്ക് കൈ മാറില്ലെന്ന് അമേരിക്ക വ്യക്തമാക്കി. കടലിൽ വീണ ബലൂണിന്റെ അവശിഷ്ടങ്ങൾ പൂർണമായും വീണ്ടെടുക്കാനുള്ള ശ്രമങ്ങൾ അമേരിക്ക ഊർജ്ജിതമാക്കി. അറ്റ്ലാന്റിക് സമുദ്രത്തിൽ വീണ അവശിഷ്ടങ്ങൾ വീണ്ടെടുത്ത് വിശദമായ ഇന്റലിജൻസ് പരിശോധനയ്ക്ക് വിധേയമാക്കും. അതെ സമയം ഇത് കാലാവസ്ഥാ നിരീക്ഷണത്തിനുള്ള ഉപകരണമാണ് എന്നതിൽ ഉറച്ചു നിൽക്കുകയാണ് ചൈന.

കാനഡയുടെ പ്രത്യക്ഷ പിന്തുണയോടെ സൗത്ത് കാരലൈന തീരത്ത് യുഎസ് വ്യോമസേനയുടെ എഫ്–22 യുദ്ധവിമാനത്തിൽ നിന്ന് തൊടുത്ത മിസൈലാണ് ബലൂൺ തകർത്തത്. കരയിൽ നിന്ന് ഏകദേശം 10 കിലോമീറ്റർ അകലെ അറ്റ്ലാന്റിക് സമുദ്രത്തിലാണു ബലൂൺ പതിച്ചത്. സമുദ്രത്തിനു മുകളിൽ നിന്ന് ചില അവശിഷ്ടങ്ങൾ ലഭിച്ചെങ്കിലും കടലിനടിയിലും വിശദമായ പരിശോധന നടത്തും.

പ്രതികൂല കാലാവസ്ഥ കാരണമാണ് കടലിനടിയിലെ പരിശോധന വൈകുന്നത്. വരും ദിവസങ്ങളിൽ കാലാവസ്ഥ അനുകൂലമായാൽ കടലിനടിയിലും പരിശോധന നടത്തുമെന്ന് അമേരിക്ക വ്യക്തമാക്കി.