പൂജവയ്പ്പിന് പിറ്റേന്നും ബാങ്കുകള്‍ക്ക് പ്രവര്‍ത്തിദിനം! ദുര്‍ഗ്ഗാഷ്ടമി ദിവസം ബാങ്കുകള്‍ക്ക് പൊതുഅവധി പ്രഖ്യാപിക്കണം. മുഖ്യമന്ത്രിക്ക് ബാങ്ക് ജീവനക്കാരുടെ ഔദ്യോഗിക നിവേദനം

ഈ വര്‍ഷത്തെ ദുര്‍ഗ്ഗാഷ്ടമി ദിനമായ ഒക്ടോബര്‍ 19-ന് കേരളത്തിലെ ബാങ്കുകള്‍ക്ക് നെഗോഷ്യബിള്‍ ഇന്‍സ്ട്രുമെന്റ്‌സ് (എന്‍.ഐ.) ആക്ട് പ്രകാരം പൊതുഅവധി പ്രഖ്യാപിക്കണമെന്ന് കേരള പ്രദേശ് ബാങ്ക് വര്‍ക്കേഴ്‌സ് ഓര്‍ഗനൈസേഷനും (കെ.പി.ബി.ഡബ്ല്യു.ഒ.) കേരള പ്രദേശ് ബാങ്ക് ഓഫീസേഴ്‌സ് ഓര്‍ഗനൈസേഷനും (കെ.പി.ബി.ഒ.ഒ.) കേരള മുഖ്യമന്ത്രിയോട് ആവശ്യപ്പെട്ടു.

ഒക്ടോബര്‍ 18 ഞായറാഴ്ച ഉച്ചയ്ക്ക് ശേഷമാണ് ഈ വര്‍ഷത്തെ പൂജവെയ്പ്പ് വരുന്നത്. കേരളീയ ആചാരപ്രകാരം പൂജവെയ്പ്പ് കഴിഞ്ഞാല്‍ പുസ്തകങ്ങളും തൊഴിലുപകരണങ്ങളും പിന്നീട് പൂജയെടുക്കുന്നതുവരെ (വിദ്യാരംഭം) തൊടുകയോ ഉപയോഗിക്കുകയോ ചെയ്യാറില്ല. എന്നാല്‍ തൊട്ടടുത്ത ദിവസമായ ഒക്ടോബര്‍ 19 തിങ്കളാഴ്ച ദുര്‍ഗ്ഗാഷ്ടമി ദിവസം ബാങ്കുകള്‍ക്ക് അവധി പ്രഖ്യാപിക്കാത്തതിനാല്‍ ജീവനക്കാര്‍ സാധാരണ പോലെ ജോലി ചെയ്യേണ്ടി വരുന്നുണ്ട്.

തൊഴിലുപകരണങ്ങള്‍ പൂജയ്ക്ക് വെച്ചതിന് ശേഷം അവ ഉപയോഗിച്ച് ജോലി ചെയ്യേണ്ടി വരുന്നത് ജീവനക്കാരില്‍ വലിയ മാനസിക വിഷമം ഉണ്ടാക്കുന്നുണ്ടെന്ന് സംഘടനകള്‍ വ്യക്തമാക്കി. ജീവനക്കാരുടെ ഈ സാംസ്‌കാരികവും ആചാരപരവുമായ ബുദ്ധിമുട്ടുകള്‍ ദയാപൂര്‍വ്വം കണക്കിലെടുത്ത് ഒക്ടോബര്‍ 19-ന് ബാങ്കുകള്‍ക്ക് എന്‍.ഐ. ആക്ട് പ്രകാരം അവധി പ്രഖ്യാപിക്കണമെന്നാണ് മുഖ്യമന്ത്രിയോട് സമര്‍പ്പിച്ചിരിക്കുന്ന ഔദ്യോഗിക നിവേദനത്തിലെ പ്രധാന ആവശ്യം. വിഷയത്തില്‍ അടിയന്തിരവും അനുകൂലവുമായ തീരുമാനം ഉണ്ടാകുമെന്നാണ് സംഘടനകളുടെ പ്രതീക്ഷ.