ദില്ലി മദ്യനയ അഴിമതിക്കേസ് : കുരുക്ക് മുറുക്കി ഇ ഡി ; കെ കവിതയ്‌ക്കെതിരെ പുതിയ കുറ്റപത്രം സമർപ്പിച്ചു

ദില്ലി മദ്യനയ അഴിമതി കേസിൽ ബിആർഎസ് നേതാവ് കെ കവിതയ്‌ക്കെതിരെ കോടതിയിൽ പുതിയ കുറ്റപത്രം സമർപ്പിച്ച് ഇ ഡി. റോസ് അവന്യൂ കോടതിയിലാണ് കുറ്റപത്രം സമർപ്പിച്ചത്. കള്ളപ്പണം വെളുപ്പിക്കൽ തടയൽ നിയമത്തിന്റെ സെക്ഷൻ 45, 44(1) പ്രകാരമാണ് കുറ്റപത്രം സമർപ്പിച്ചിരിക്കുന്നത്. ഇഡിയുടെ വാദം മെയ് 13ന് കോടതി കേൾക്കും.

ദില്ലി മുഖ്യമന്ത്രിയും എഎപി അദ്ധ്യക്ഷനുമായ അരവിന്ദ് കെജ്‌രിവാളിനെതിരെ സമാനമായ പരാതി അടുത്തയാഴ്ച സമർപ്പിക്കുമെന്നാണ് വിവരം. ആം ആദ്മി നേതാവും മുൻ ദില്ലി ഉപമുഖ്യമന്ത്രിയുമായ മനീഷ് സിസോദിയ, എഎപി രാജ്യസഭാ എംപി സഞ്ജയ് സിംഗ് എന്നിവരടക്കം 18 പേരെ ഇതുവരെ അറസ്റ്റ് ചെയ്ത കേസിൽ ഇഡിയുടെ ആറാമത്തെ അനുബന്ധ കുറ്റപത്രമാണിത്. ഇതിൽ സഞ്ജയ് സിംഗിന് നേരത്തെ ജാമ്യം ലഭിച്ചിരുന്നു. ജാമ്യ വ്യവസ്ഥയുടെ ഭാഗമായി അരവിന്ദ് കെജ്‌രിവാളിന് മേൽ നിയന്ത്രണങ്ങൾ ഏർപ്പെടുത്തിക്കൊണ്ട് ജൂൺ 1 വരെ ഇടക്കാല ജാമ്യം കോടതി ഇന്ന് അനുവദിക്കുകയും ചെയ്തു.