സി എം ആർ എൽ 103 കോടി രൂപയുടെ ദുരൂഹ ഇടപാടുകൾ നടത്തി; കൃത്രിമ ഇടപാടുകളിലൂടെ ചെലവുകൾ പെരുപ്പിച്ച് കാട്ടി; മാസപ്പടിക്കേസിൽ അന്വേഷണം റദ്ദാക്കാൻ കോടതിയിൽ പോയ കമ്പനിക്ക് വൻ തിരിച്ചടി

ദില്ലി: വിവാദ കരിമണൽ കമ്പനിയായ സി എം ആർ എൽ 103 കോടിയുടെ ദുരൂഹ ഇടപാടുകൾ നടത്തിയതായി രജിസ്ട്രാർ ഓഫ് കമ്പനീസ്. 2012 മുതൽ 2019 വരെ നടന്ന ഇടപാടുകളിൽ എസ് എഫ് ഐ ഒ നടത്തിയ അന്വേഷണത്തിലാണ് ക്രമക്കേടുകൾ കണ്ടെത്തിയത്. കൃത്രിമ ഇടപാടുകൾ കാണിച്ച് ചെലവ് പെരുപ്പിച്ച് കാട്ടിയതായി കണ്ടെത്തിയിട്ടുണ്ട്. ഈ തുകയുടെ ഗുണഭോക്താക്കൾ ആരാണ് എന്നകാര്യത്തിൽ അന്വേഷണം നടന്നുവരികയാണെന്നും ദില്ലി ആർ ഒ സി വ്യക്തമാക്കുന്നു. മാസപ്പടിക്കേസിൽ നടക്കുന്ന എസ് എഫ് ഐ ഒ അന്വേഷണം റദ്ദാക്കണം എന്നാവശ്യപ്പെട്ട് ദില്ലി ഹൈക്കോടതിയിൽ സി എം ആർ എൽ നൽകിയ ഹർജിക്കെതിരെ ദില്ലി ആർ ഒ സി നൽകിയ കേസ് സ്റ്റാറ്റസ് റിപ്പോർട്ടിലാണ് ഈ വിവരങ്ങളുള്ളത്.

അന്വേഷണം നിയമാനുസൃതമാണെന്നും സുപ്രീംകോടതി വിധി ഈ വിഷയത്തിൽ നിലവിലുണ്ടെന്നും ആർ ഒ സി ദില്ലി ഹൈക്കോടതിയെ അറിയിച്ചു. അതേസമയം തങ്ങൾക്ക് ഇന്ററിം സെറ്റിൽമെന്റ് ബോർഡിന്റെ പരിരക്ഷയുണ്ടെന്നും അന്വേഷണം റദ്ദാക്കണമെന്നുമാണ് സി എം ആർ എല്ലിന്റെ വാദം.

മുഖ്യമന്ത്രി പിണറായി വിജയൻറെ മകൾ വീണാ വിജയൻറെ കമ്പനിയായ എക്‌സാലോജിക്കിന് മാസപ്പടി നൽകിയ കേസിലാണ് എസ് എഫ് ഐ ഒ അന്വേഷണം നടക്കുന്നത്. സർക്കാരിനും മുഖ്യമന്ത്രി ഉൾപ്പെടെയുള്ള രാഷ്ട്രീയ നേതാക്കൾക്കും തുച്ഛമായ തുക കൈക്കൂലി നൽകി ഏകദേശം 40000 കോടി രൂപയുടെ കരിമണൽ സി എം ആർ എൽ കടത്തിയെന്ന ആരോപണം നേരിടുകയാണ് കമ്പനി. ഈയവസരത്തിലാണ് ഞെട്ടിക്കുന്ന വിവരങ്ങൾ അടങ്ങിയ കേസ് സ്റ്റാറ്റസ് റിപ്പോർട്ട് ദില്ലി ഹൈക്കോടതിയിൽ സമർപ്പിക്കപ്പെട്ടത്. എക്‌സാലോജിക്കിന് വിദേശ അക്കൗണ്ടുകൾ ഉണ്ടെന്നും സി എം ആർ എല്ലും പി ഡബ്ള്യു സിയും അടങ്ങുന്ന കമ്പനികൾ ആ അക്കൗണ്ടുകളിൽ കോടികൾ നിക്ഷേപിച്ചതായും നേരത്തെ ആരോപണങ്ങൾ ഉയർന്നിരുന്നു.