അമേരിക്കയ്ക്ക് ബി-2 ബോംബർ വിമാനം നഷ്ടമായി? ഇറാനെ തെറ്റിദ്ധരിപ്പിക്കാനായി പസഫിക്കിലൂടെ പറന്ന വിമാനങ്ങൾ മടങ്ങിയെത്തിയില്ലെന്ന് റിപ്പോർട്ട്; പുതിയ വിവാദം

ന്യൂയോർക്ക്: ഇറാന്റെ ആണവകേന്ദ്രങ്ങളിൽ ആക്രമണം നടത്താനെത്തിയ ബി-2 ബോംബർ വിമാനങ്ങളെ ചൊല്ലി പുതിയ വിവാദം. ഇറാന്റെ പ്രതിരോധ സംവിധാനങ്ങളെ തെറ്റിദ്ധരിപ്പിക്കാനായി എതിർദിശയിലേക്കു പറന്ന ബോംബറുകളിൽ ചിലത് അമേരിക്കൻ വ്യോമതാവളത്തിൽ തിരിച്ചെത്തിയില്ലെന്നാണ് റിപ്പോർട്ട്.

ജൂൺ 21-ന് മിസ്സോറിയിലെ വൈറ്റ്മാൻ എയർഫോഴ്‌സ് ബേസിൽനിന്നാണ് ദൗത്യവുമായി യുഎസ് ബി-2 ബോംബറുകളുടെ രണ്ട് സംഘങ്ങൾ പറന്നുയർന്നത്. ഇറാന്റെ പ്രതിരോധ സംവിധാനങ്ങളെ കബളിപ്പിക്കാനായി ആദ്യസംഘം പടിഞ്ഞാറ് ഭാഗത്ത് പസഫിക് സമുദ്രത്തിന് മുകളിലൂടെയാണ് പറന്നത്. രണ്ടാം സംഘമാണ്ടെഹ്‌റാനിലെ ഫൊർദോ അടക്കമുള്ള ഭൂഗർഭ ആണവകേന്ദ്രങ്ങളെ ആക്രമിക്കാൻ കിഴക്കോട്ട് പറന്നത്.രണ്ടാമത്തെ സംഘം ദൗത്യം പൂർത്തിയാക്കി താവളത്തിൽ തിരിച്ചെത്തിയെങ്കിലും . പസഫിക്കിലേക്ക് പറന്ന സംഘത്തെക്കുറിച്ച് അധികം വിവരങ്ങൾ ലഭ്യമല്ല. ആ സംഘത്തിലെ ഒരു വിമാനമെങ്കിലും ഹവായിയിൽ അടിയന്തരമായി ഇറങ്ങാൻ നിർബന്ധിതമായി എന്നാണ് ഇപ്പോൾ പുറത്തുവരുന്നത്.

ഈ സ്റ്റെൽത്ത് ബോംബർ ഹൊനോലുലുവിലെ ഹിക്കം എയർഫോഴ്‌സ് ബേസുമായി റൺവേ പങ്കിടുന്ന ഡാനിയൽ കെ. ഇനോയെ അന്താരാഷ്ട്ര വിമാനത്താവളത്തിൽ ഇറങ്ങിയതായാണ് റിപ്പോർട്ട്. ഇതിന്റെ വിശദാംശങ്ങളൊന്നും പുറത്തുവിട്ടിട്ടില്ല. ബി-2 ബോംബറുകൾ മുമ്പും ഹവായിയിൽ ഇറങ്ങിയിട്ടുണ്ട്. 2023 ഏപ്രിലിൽ, സമാനമായ അടിയന്തര ലാൻഡിങ് ഹിക്കാമിൽ നടന്നിരുന്നു.