സന്ദർശനത്തിനെത്തിയ നരേന്ദ്രമോദിക്ക് ചൈനീസ് ഭരണകൂടം അനുവദിച്ചത് ഷി ജിൻപിങ്ങിന്റെ ഇഷ്ടവാഹനം ! വാർത്തകളിൽ വീണ്ടും ഇടം നേടി ചൈനയുടെ ചരിത്രം പേറുന്ന ഹോങ്ചി കാർ

എസ്‌സിഒ ഉച്ചകോടിക്കായി തിയാൻജിനിൽ രണ്ട് ദിവസം തങ്ങുന്ന പ്രധാനമന്ത്രി നരേന്ദ്ര മോദിക്ക് ചൈനീസ് സർക്കാർ അനുവദിച്ചത് ഔദ്യോഗിക സന്ദർശനങ്ങളിൽ പ്രസിഡന്റ് ഷി ജിൻപിങ്ങിന്റെ ഇഷ്ടവാഹനമായ ഹോങ്ചി കാർ. 2019-ൽ മഹാബലിപുരത്ത് പ്രധാനമന്ത്രി മോദിയെ സന്ദർശിച്ചപ്പോൾ ഷി ഉപയോഗിച്ചിരുന്നു. അന്ന് പ്രത്യേകമായി വിമാനത്തിൽ ഇന്ത്യയിലേക്ക് കൊണ്ടുവന്നതായിരുന്നു ഇത്.

അതേസമയം പ്രസിഡന്റ് വ്‌ളാഡിമിർ പുടിൻ തിയാൻജിൻ നഗരത്തിൽ സഞ്ചരിക്കുന്നത് ചൈനീസ് നയതന്ത്ര ലൈസൻസ് പ്ലേറ്റുകളുള്ള തന്റെ പ്രസിഡൻഷ്യൽ “ഓറസ്” കാറിലായിരിക്കും. റഷ്യൻ വാഹന നിർമാതാക്കളായ ഓറസ് മോട്ടോഴ്‌സ് നിർമിച്ച ഒരു റെട്രോ-സ്റ്റൈൽ ആഡംബര വാഹനമാണ് ഓറസ്.

ഹോങ്ചിയുടെ ചരിത്രം 1958 മുതലാണ് ആരംഭിക്കുന്നത്. ചൈനീസ് കമ്മ്യൂണിസ്റ്റ് പാർട്ടിയിലെ (സിപിസി) ഉന്നതർക്കായി സർക്കാർ ഉടമസ്ഥതയിലുള്ള ഫസ്റ്റ് ഓട്ടോമോട്ടീവ് വർക്ക്സ് (FAW) ആണ് ഈ വാഹനം പുറത്തിറക്കിയത്. ചൈനയിലെ ഭരണകക്ഷിയായ കമ്മ്യൂണിസ്റ്റ് പാർട്ടിയുടെ സ്ഥാപകനായ മാവോ സേതുങ്ങിൻ്റെ കാലം മുതൽ നേതാക്കൾ ഉപയോഗിക്കുന്ന ഒരു ആഡംബര ചൈനീസ് കാറാണ് “ഹോങ്ചി”.

മുമ്പ് ഉന്നത സർക്കാർ ഉദ്യോഗസ്ഥരുടെയും പ്രമുഖരായ അതിഥികളുടെയും ഔദ്യോഗിക വാഹനമായിരുന്ന ഹോങ്ചി , ഇടക്കാലത്ത് വിദേശ നിർമ്മിത കാറുകളുടെ കടന്നുകയറ്റത്തിൽ പ്രൗഢി നഷ്ടപ്പെട്ടിരുന്നു. എന്നാൽ, ചൈനീസ് ഉൽപ്പന്നങ്ങളെ പ്രോത്സാഹിപ്പിക്കാനുള്ള സർക്കാർ നയത്തിൻ്റെ ഭാഗമായി ഹോങ്ചി അതിൻ്റെ പഴയ പ്രതാപം വീണ്ടെടുക്കുകയാണ്.

ചൈനീസ് ഓട്ടോമൊബൈൽ ഭീമനായ എഫ്.എ.ഡബ്ല്യു. ഗ്രൂപ്പ് നിർമ്മിക്കുന്ന ഹോങ്ചിക്ക് വലിയ ചരിത്രമുണ്ട്. 1970-കളിൽ അമേരിക്കൻ പ്രസിഡൻ്റ് റിച്ചാർഡ് നിക്സൺ ചൈന സന്ദർശിച്ചപ്പോൾ ചൈനയുടെ അന്നത്തെ പരമോന്നത നേതാവ് മാവോ സെ-തുങ് അദ്ദേഹത്തെ കൊണ്ടുപോയത് ഹോങ്ചി കാറിലായിരുന്നു. ഇത് ആഗോളതലത്തിൽ ഹോങ്ചി വലിയ ശ്രദ്ധ നേടിക്കൊടുത്തു. എന്നാൽ 1990-കളിൽ ചൈനീസ് നേതാക്കൾ ഓഡി, മെഴ്സിഡസ് ബെൻസ് തുടങ്ങിയ വിദേശ ബ്രാൻഡുകളിലേക്ക് മാറിയതോടെ ഹോങ്ചിയുടെ പ്രചാരം കുത്തനെ ഇടിഞ്ഞു. 2012-ൽ കമ്മ്യൂണിസ്റ്റ് പാർട്ടി കേഡർമാരോട് നടത്തിയ പ്രസംഗത്തിൽ പ്രസിഡൻ്റ് ഷി ജിൻപിങ് ചൈനീസ് നേതാക്കൾ സ്വദേശി കാറുകൾ മാത്രമേ ഉപയോഗിക്കാവൂ എന്ന് വ്യക്തമാക്കി. ഈ നയം ഹോങ്ചിയുടെ പുനരുജ്ജീവനത്തിന് വഴിയൊരുക്കി. 2013-ൽ അന്നത്തെ വിദേശകാര്യ മന്ത്രി വാങ് യി തൻ്റെ ഔദ്യോഗിക വാഹനമായി ഹോങ്ചി എച്ച്7 തിരഞ്ഞെടുത്ത് ഈ നയത്തിന് തുടക്കമിട്ടു.

ഇപ്പോൾ, ചൈനയിലെത്തുന്ന വിദേശ രാഷ്ട്രത്തലവൻമാർക്കും നയതന്ത്ര പ്രതിനിധികൾക്കും ഔദ്യോഗിക യാത്രകൾക്കായി ഹോങ്ചി കാറുകളാണ് നൽകുന്നത്. ചൈനീസ് പൈതൃകത്തെയും ദേശീയ അഭിമാനത്തെയും ഉയർത്തിപ്പിടിക്കുന്ന ഒരു പ്രതീകമായി ഹോങ്ചിയെ ചൈന കാണുന്നു