സിനിമയിലെ മാഫിയാ കൂട്ടുകെട്ടിനെതിരെ സംവിധായകൻ സനൽ കുമാർ ശശിധരൻ മരണം വരെ നിരാഹാര സമരത്തിലേക്ക്; ജൂലൈ ഒന്നു മുതൽ സമരം തുടങ്ങുമെന്ന് പ്രഖ്യാപനം

തിരുവനന്തപുരം: മലയാള ചലച്ചിത്ര മേഖലയിലെ മാഫിയാ കൂട്ടുകെട്ടുകൾക്കും തനിക്കെതിരെയുള്ള കള്ളക്കേസുകൾക്കും നീതി നിഷേധത്തിനുമെതിരെ പ്രത്യക്ഷ സമരപ്രഖ്യാപനവുമായി പ്രശസ്ത ചലച്ചിത്ര സംവിധായകൻ സനൽ കുമാർ ശശിധരൻ. വരുന്ന ജൂലൈ മാസം ഒന്നാം തിയതി മുതൽ മരണം വരെയുള്ള നിരാഹാര സമരത്തിലേക്ക് താൻ കടക്കുകയാണെന്ന് അദ്ദേഹം ഔദ്യോഗികമായി അറിയിച്ചു. കഴിഞ്ഞ ഏഴു വർഷത്തോളമായി നീതിക്കുവേണ്ടി താൻ നടത്തിവരുന്ന നിശബ്ദ സമരം അവഗണിക്കപ്പെട്ട സാഹചര്യത്തിലാണ് ജീവൻ ബലികഴിച്ചുകൊണ്ടുള്ള കഠിനമായ ഈ തീരുമാനത്തിലേക്ക് എത്തിയതെന്ന് സനൽ കുമാർ ശശിധരൻ വ്യക്തമാക്കി. തന്റെ പഴയ കോൺടാക്ട് ലിസ്റ്റിലുള്ള അഞ്ഞൂറോളം സുഹൃത്തുക്കൾക്ക് വാട്സ്ആപ്പ് സന്ദേശം അയച്ചുകൊണ്ടാണ് അദ്ദേഹം ഈ ജീവന്മരണ സമരത്തിന് പിന്തുണ അഭ്യർത്ഥിച്ചത്.

‘കയറ്റം’ എന്ന സിനിമയ്ക്ക് ശേഷം തന്റെ കരിയറിലെ എല്ലാ ചിത്രങ്ങളും പൂഴ്ത്തിവെയ്ക്കാനും വ്യക്തിപരമായി തേജോവധം ചെയ്യാനും സിനിമാരംഗത്തെ ഒരു പ്രത്യേക മാഫിയാ കൂട്ടുകെട്ട് നിരന്തരം ശ്രമിച്ചുവരികയാണെന്ന് അദ്ദേഹം ആരോപിക്കുന്നു. ഈ ചിത്രത്തിലെ പ്രൊഡ്യൂസറും അഭിനേത്രിയുമായ മഞ്ജു വാര്യരുമായി വ്യക്തിബന്ധമുണ്ടെന്ന പേരിൽ കേരള പോലീസ് തനിക്കെതിരെ രണ്ട് കള്ളക്കേസുകൾ രജിസ്റ്റർ ചെയ്യുകയായിരുന്നുവെന്നും അദ്ദേഹം പറയുന്നു. യാതൊരുവിധ നിയമപരമായ നടപടിക്രമങ്ങളും പാലിക്കാതെ തന്നെ രണ്ടുതവണ മനുഷ്യത്വരഹിതമായി അറസ്റ്റ് ചെയ്തതായും, അതിനുശേഷം താനൊരു സ്ത്രീ പീഡകനാണെന്ന രീതിയിൽ സമൂഹത്തിൽ വലിയ രീതിയിലുള്ള വ്യാജപ്രചാരണങ്ങൾ നടത്തി അസ്പർശ്യത സൃഷ്ടിക്കാൻ ഈ മാഫിയയ്ക്ക് കഴിഞ്ഞുവെന്നും സനൽ കുമാർ ശശിധരൻ സങ്കടത്തോടെ ചൂണ്ടിക്കാണിക്കുന്നു.

തനിക്കെതിരെയുള്ള വ്യാജപ്രചാരണങ്ങളുടെയും കള്ളക്കേസുകളുടെയും സത്യാവസ്ഥ പുറത്തുവരുന്നത് വരെ ഇനി സിനിമ ചെയ്യില്ലെന്ന ഉറച്ച തീരുമാനത്തിലായിരുന്നു അദ്ദേഹം. ആദ്യ കേസ് രജിസ്റ്റർ ചെയ്ത് മൂന്ന് വർഷം പിന്നിട്ടിട്ടും കൃത്യമായ തെളിവുകളൊന്നുമില്ലാതെയാണ് പോലീസ് ഇപ്പോൾ കോടതിയിൽ കുറ്റപത്രം സമർപ്പിച്ചിരിക്കുന്നത്. കേസിൽ പരാതിക്കാരിയായ മഞ്ജു വാര്യർക്ക് കോടതിയിൽ ഹാജരായി മൊഴി നൽകാൻ സമൻസ് പുറപ്പെടുവിച്ചിട്ടുണ്ടെന്നും, എന്നാൽ ഈ വിവരങ്ങളൊന്നും പൊതുസമൂഹത്തിൽ എത്താതിരിക്കാൻ ബന്ധപ്പെട്ട മാഫിയ ഇപ്പോഴും തനിക്കെതിരെ നിഴൽവേട്ടയും വ്യക്തിഹത്യയും തുടരുകയാണെന്നും സംവിധായകൻ ആരോപിക്കുന്നു.

ഈ വിഷയത്തിന് പിന്നിലെ യഥാർത്ഥ ഗൂഢാലോചന അന്വേഷിക്കണമെന്ന് ആവശ്യപ്പെട്ട് ബഹുമാനപ്പെട്ട മുഖ്യമന്ത്രിക്കും ആഭ്യന്തര മന്ത്രിക്കും പരാതി നൽകിയിട്ടും മുൻ സർക്കാരുകളെപ്പോലെ നിലവിലെ സർക്കാരും യാതൊരുവിധ നടപടിയും സ്വീകരിക്കാൻ തയ്യാറായിട്ടില്ല. ഈ സാഹചര്യത്തിലാണ് നീതിക്ക് വേണ്ടി സ്വന്തം ജീവൻ പണയം വെച്ച് നിരാഹാര സമരത്തിലേക്ക് നീങ്ങാൻ അദ്ദേഹം നിർബന്ധിതനായത്. പണവും അധികാരവുമില്ലാത്ത സാധാരണക്കാരായ മനുഷ്യർ ഇന്ന് നേരിടുന്ന അനീതിക്കെതിരായ പോരാട്ടമാണിതെന്നും സാമൂഹ്യനന്മയെ പ്രതി എല്ലാവരും ഇതിനെ പിന്തുണയ്ക്കണമെന്നും സനൽ കുമാർ ശശിധരൻ അഭ്യർത്ഥിച്ചു. എന്നാൽ ഇത്രയും ഗുരുതരമായ ഒരു സന്ദേശം അഞ്ഞൂറോളം സുഹൃത്തുക്കൾക്ക് അയച്ചിട്ടും മൂന്ന് പേർ മാത്രമാണ് ഒപ്പമുണ്ടെന്ന് അറിയിച്ചതെന്നും നൂറുകണക്കിന് ആളുകൾ ഇത് കണ്ടതായിപ്പോലും നടിച്ചില്ലെന്നും അദ്ദേഹം നിരാശയോടെ കൂട്ടിച്ചേർത്തു.