പണിക്ക് കയറേണ്ട ! ഇടതു സ്ഥാനാർത്ഥിയുടെ സ്വീകരണ പരിപാടിയിൽ പങ്കെടുത്താൽ മതി !തൊഴിലുറപ്പ് തൊഴിലാളികൾക്ക് മേറ്റിന്റെ നിർദേശം ! തെരഞ്ഞെടുപ്പ് കമ്മീഷന് പരാതി നൽകുമെന്ന് കോൺഗ്രസ്

കോട്ടയം മണ്ഡലത്തിലെ ഇടതു സ്ഥാനാർത്ഥി തോമസ് ചാഴിക്കാടന്റെ സ്വീകരണ പരിപാടിയിൽ പങ്കെടുക്കാൻ തൊഴിലുറപ്പ് തൊഴിലാളികൾക്ക് നിർദേശം നൽകിയത് വിവാദമാകുന്നു. കോട്ടയം വിജയപുരത്തെ ഒമ്പതാം വാർഡിലെ തൊഴിലുറപ്പ് തൊഴിലാളികൾക്കാണ് നിർദ്ദേശം കിട്ടിയത്.സംഭവത്തിൽ തെരഞ്ഞെടുപ്പ് കമ്മീഷന് പരാതി നൽകുമെന്ന് കോൺഗ്രസ് അറിയിച്ചു.

“ഇടതു സ്ഥാനാർത്ഥി തോമസ് ചാഴികാടനെ സ്വീകരിക്കാൻ തൊഴിലുറപ്പ് തൊഴിലാളികൾ എല്ലാവരും പങ്കെടുക്കണം. അതിനാൽ പണിക്ക് കയറേണ്ട . ജോലിക്ക് കയറിയെന്ന് രേഖപ്പെടുത്തിയതിനുശേഷം പ്രചാരണത്തിന് പോകുക.”- എന്നായിരുന്നു മേറ്റിന്റെ ചുമതലയുള്ള ജ്യോതിയുടെ നിർദേശം. എന്നാൽ മെമ്പർ പറഞ്ഞത് താൻ അനുസരിക്കുക മാത്രമാണ് താൻ ചെയ്തതെന്ന് ജ്യോതി പ്രതികരിച്ചു. നിർദേശം നൽകിയെങ്കിലും തൊഴിലാളികളെല്ലാം ജോലിക്ക് ഹാജരായെന്നും സ്വീകരണ യോഗത്തിന് പോയിട്ടില്ലെന്നും അധികൃതർ വ്യക്തമാക്കി.