കെന്റ് .. ഇത് നിനക്കുള്ള രാജ്യത്തിന്റെ ആദരം ! ഭീകരരുമായുള്ള ഏറ്റുമുട്ടലിനിടെ വീരമൃത്യു വരിച്ച ഡോഗ് സ്‌ക്വാഡിലെ നായ കെന്റിന് രാഷ്ട്രപതിയുടെ ധീരതാ പുരസ്കാരം

ദില്ലി : ജമ്മുകാശ്മീരിൽ ഭീകരരെ തുരത്താനുളള സൈനിക ഓപ്പറേഷനിടെ ഭീകരരുടെ വെടിയേറ്റ് ജീവന്‍ നഷ്ടമായ കരസേനയുടെ ഡോഗ് സ്‌ക്വാഡിലെ നായ കെന്റിന് രാഷ്ട്രപതിയുടെ ധീരതാ പുരസ്കാരം. മരണാനന്തര ബഹുമതിയായാണ് കെന്റിന് ഗാലൻട്രി അവാർഡ് പുരസ്കാരം. കഴിഞ്ഞ സെപ്റ്റംബറിൽ ജമ്മുവിൽ നടന്ന ഓപ്പറേഷനിടെയാണ് ആറ് വയസുകാരിയായ കെന്റ് വീരമൃത്യു വരിച്ചത്.

രജൗരിയിൽ ഭീകരർ തമ്പടിച്ചിട്ടുണ്ടെന്ന വിവരത്തെ തുടർന്നാണ് സൈന്യം എത്തിയത്. ഭീകരരുടെ താവളത്തിലേക്ക് സൈന്യത്തിന് വഴികാട്ടിയായത് കെന്റായിരുന്നു. സൈനിക സാന്നിധ്യം തിരിച്ചറിഞ്ഞതോടെ ഭീകരർ വെടിവെപ്പ് തുടങ്ങി. എന്നിട്ടും കെന്റ് പിന്മാറിയില്ല. ഭീകരുടെ താവളം ലക്ഷ്യമാക്കി നീങ്ങിയ കെന്റിനു തന്റെ ഹാൻഡ്ലറായ സൈനികനെ ഭീകരരുടെ ആക്രമണത്തിൽനിന്ന് രക്ഷപ്പെടുത്താൻ ശ്രമത്തിനിടെയാണ് വെടിയേറ്റത്. സംഭവ സ്ഥലത്തുവെച്ച് തന്നെ കെന്‍റ് കൊല്ലപ്പെട്ടു.

8B8 ആർമി നമ്പറിലുള്ള പ്രത്യേക ട്രാക്കർ നായ ആയിരുന്നു കെന്റ്. അന്ന് പോരാട്ടഭൂമിയിൽ വീരമൃത്യുവരിച്ച കെന്റിനെ ത്രിവർണ പതാക പുതപ്പിച്ച് പുഷ്പചക്രം സമർപ്പിച്ചാണ് യാത്രാമൊഴി നൽകിയത്. ഓപ്പറേഷനിൽ രണ്ട് ഭീകരരും ഒരു സൈനികനും കൊല്ലപ്പെട്ടിരുന്നു. മൂന്ന് സുരക്ഷാ ഉദ്യോ​ഗസ്ഥർക്കും രണ്ട് സൈനികർക്കും ഒരു പൊലീസുകാരനും ഏറ്റുമുട്ടലിൽ പരിക്കേറ്റു.