സർക്കാർ ധന സഹായത്തിൽ നിന്ന് EMI പിടിക്കരുത് ! ബാങ്കുകൾക്ക് സർക്കാർ നിർദ്ദേശം നൽകണം ! വയനാട് ദുരന്ത ബാധിതർക്കായി സുപ്രധാന ഇടപെടലുമായി ഹൈക്കോടതി

വയനാട് ഉരുൾപ്പൊട്ടൽ ദുരന്തബാധിതർക്ക് ലഭിച്ച സര്‍ക്കാര്‍ സഹായത്തില്‍ നിന്ന് ലോൺ തിരിച്ചടവ് പിടിക്കരുതെന്നും ഇക്കാര്യത്തില്‍ സംസ്ഥാന സര്‍ക്കാര്‍ ബാങ്കുകൾക്ക് നിര്‍ദ്ദേശം നല്‍കണമെന്നും ഹൈക്കോടതി. ദുരന്ത ബാധിതരോട് ബാങ്കുകള്‍ അനുകമ്പ കാട്ടണമെന്നും മൗലികമായ കടമ മറക്കരുതെന്നും കോടതി ആവശ്യപ്പെട്ടു.വയനാട്ടിലെ മുണ്ടക്കൈ, ചൂരൽമല ഉരുൾപൊട്ടൽ ദുരിതബാധിതർക്ക് സർക്കാർ അനുവദിച്ച അടിയന്തര ധനസഹായമായ 10,000 രൂപയിൽ നിന്നും നേരത്തെ ബാങ്ക് വായ്പ തിരിച്ചടവ് ഈടാക്കിയത് ഏറെ വിവാദമായിരുന്നു.

വയനാട് ദുരന്തവുമായി ബന്ധപ്പെട്ട് സ്വമേധയാ എടുത്ത കേസിലായിരുന്നു കോടതിയുടെ വാക്കാലുള്ള നിര്‍ദേശം. കേസ് ഒരാഴ്ച്ച കഴിഞ്ഞ് വീണ്ടും പരിഗണിക്കും.

വയനാട്ടിലെ മുണ്ടക്കൈ, ചൂരൽമല ഉരുൾപൊട്ടൽ ദുരിതബാധിതർക്ക് സർക്കാർ അനുവദിച്ച അടിയന്തര ധനസഹായമായ 10,000 രൂപയിൽ നിന്നും വായ്പ തിരിച്ചടവ് ഈടാക്കിയ കേരള ഗ്രാമീൺ ബാങ്കിനെതിരെ മനുഷ്യാവകാശ കമ്മീഷൻ നേരത്തെ സ്വമേധയാ കേസെടുത്തിരുന്നു. ബാങ്കിന്റെ ചൂരൽമല ശാഖയിൽ നിന്നും വായ്പയെടുത്തവരിൽ നിന്നാണ് പ്രതിമാസ തിരിച്ചടവ് ഈടാക്കിയതെന്നാണ് പരാതി.

വയനാട്ടിലെ ദുരന്തബാധിതരിൽ നിന്ന് ബാങ്ക് വായ്പ തിരിച്ചടവ് ഉടൻ ഉണ്ടാകില്ലെന്ന സ്റ്റേറ്റ് ലെവൽ ബാങ്കേഴ്സ് സമിതിയും (SLBC) സർക്കാരിന്‍റെയും ഉറപ്പ് നൽകിയിരുന്നെങ്കിലും ചൂരൽമലയിലെ കേരള ഗ്രാമീണ ബാങ്കിൽ നിന്ന് വായ്പ എടുത്തവരിൽ നിന്ന് ഇഎംഐ പിടിക്കുകയായിരുന്നു.