ഡ്രെഡ്ജർ വെസൽ ദൗത്യ സ്ഥലത്തെത്തി ! ഷിരൂരിൽ തെരച്ചിൽ ഉടൻ പുനരാരംഭിക്കും

കർണാടകയിലെ ഷിരൂരിൽ മണ്ണിടിച്ചിലിൽ കാണാതായ മലയാളി ട്രക്ക് ഡ്രൈവർ അർജുൻ അടക്കമുള്ള മൂന്ന് പേർക്കായുള്ള തെരച്ചിൽ ദൗത്യം ഉടന്‍ ആരംഭിക്കും. ഡ്രെഡ്ജർ വെസൽ ദൗത്യ സ്ഥലത്തെത്തി. അധികൃതരുടെ നിർദേശം കിട്ടിയാലുടൻ തന്നെ ഡ്രഡ്ജിംഗ് തുടങ്ങും. രാവിലെ 8 മുതൽ വൈകുന്നേരം 6 വരെയാകും ഡ്രെഡ്‍ജിംഗ് നടക്കുക. നിലവിൽ മൂന്ന് ദിവസത്തെ കരാറിലാണ് ഡ്രെഡ്ജർ ദൗത്യ സ്ഥലത്ത് എത്തിച്ചത്.

ദൗത്യ സ്ഥലത്തിന് 200 മീറ്റർ മാറി ഡ്രെഡ്ജർ നങ്കൂരമിട്ടിരിക്കുകയാണ്. ഇവിടെ നിന്ന് ഡ്രസ്ജർ ഉറപ്പിക്കാനുള്ള തൂണുകൾ സ്ഥാപിച്ച ശേഷമാകും ദൗത്യസ്ഥലത്തേക്ക് കൃത്യമായി മാറ്റുക. പുഴയുടെ ഒഴുക്ക് ഒരു നോട്ടായി കുറഞ്ഞത് തെരച്ചിലിന് അനുകൂലമാണ്. പുഴയുടെ അടിത്തട്ടിൽ ലോറി ഉണ്ടാകാൻ സാധ്യതയുള്ള സ്ഥലത്തെ തടസ്സം നീക്കലാകും പ്രധാനപ്രവൃത്തി. നാവികസേനയുടെ നിർദേശപ്രകാരമായിരിക്കും തെരച്ചിൽ തുടരുക. മൂന്ന് ദിവസം തെരച്ചിൽ നടത്താനാണ് നിലവിലെ തീരുമാനമെങ്കിലും ഇത് കുറച്ച് ദിവസങ്ങൾ കൂടി നീണ്ട് പോകാനാണ് സാധ്യത. മത്സ്യത്തൊഴിലാളിയും പ്രാദേശിക മുങ്ങല്‍ വിദഗ്ധനുമായ ഈശ്വർ മൽപെ ഷിരൂരിലെ ദൗത്യ സ്ഥലത്തെത്തിയിട്ടുണ്ട്. അധികൃതരുടെ അനുമതി ലഭിച്ചാൽ മുങ്ങി പരിശോധിക്കാൻ തയ്യാറാണെന്ന് അദ്ദേഹം പ്രതികരിച്ചു.