എ ഐ ക്യാമറയ്ക്ക് പിന്നാലെ നിയമ ലംഘകരെ കുടുക്കാൻ ഡ്രോൺ?; ശുപാർശയുമായി മോട്ടർവാഹനവകുപ്പ്

തിരുവനന്തപുരം:എ ഐ ക്യാമറയ്ക്ക് പിന്നാലെ നിയമ ലംഘകരെ കുടുക്കാൻ ഡ്രോൺ വേണമെന്ന ശുപാർശയുമായി മോട്ടോർവാഹന വകുപ്പ്. ക്യാമറ സ്ഥാപിച്ചിട്ടുള്ള സ്ഥലങ്ങൾ മുൻകൂട്ടി മനസിലാക്കി യാത്രക്കാർ ആ സ്ഥലത്ത് എത്തുമ്പോൾ കൃത്യമായി ജാഗ്രത പാലിക്കുന്നുണ്ടെന്നും അല്ലാത്ത ഇടങ്ങളിൽ അവ പാലിക്കുന്നില്ലെന്നും കണ്ടെത്തിയതിന് പിന്നാലെയാണ് മോട്ടോർ വാഹന വകുപ്പ് ശുപാർശ നൽകിയത്. ഒരു ജില്ലയിൽ 10 ഡ്രോൺ ക്യാമറ വേണമെന്നാണ് ശുപാർശ. കേരളമൊട്ടാകെ ക്യാമറകൾ സ്ഥാപിച്ചതിലെ ആരോപണങ്ങളും വിവാദങ്ങളും നിലനിൽക്കുമ്പോഴാണ് പുതിയ ശുപാർശയുമായി മോട്ടോർ വാഹന വകുപ്പ് രംഗത്ത് എത്തിയിരിക്കുന്നത്.

ഡ്രോണിൽ ഘടിപ്പിച്ച ഒരു ക്യാമറയിൽ തന്നെ വിവിധ നിയമലംഘനങ്ങൾ പിടികൂടും വിധത്തിലാണ് പുതിയ സംവിധാനം ഒരുക്കുക. നിലവിൽ 232 കോടി മുടക്കി സ്ഥാപിച്ച 726ൽ 692 ക്യാമറകൾ മാത്രമെ പ്രവർത്തിക്കുന്നുള്ളു. ക്യാമറകൾ സ്ഥാപിച്ചിരുന്ന സ്ഥലങ്ങളിൽ നിയമലംഘങ്ങൾ കുറവുണ്ടെന്നാണ് എംവിഡിയുടെ വിലയിരുത്തൽ.