മാസപ്പടിയിൽ ഹവാല ഇടപാട് നടന്നെന്ന് ഇഡി! വീണ ദുബായിലേക്ക് 85 ലക്ഷം അയച്ചതിന്റെ രേഖ പിടിച്ചെടുത്ത ഡയറിയിൽ! 20 കോടിയുടെ ഇടപാട് വിവരങ്ങളും ഡയറിയിൽ

തിരുവനന്തപുരം: മാസപ്പടിക്കേസുമായി ബന്ധപ്പെട്ട് പ്രതിപക്ഷ നേതാവ് പിണറായി വിജയന്റെ മകൾ വീണ വിജയനെതിരെ എൻഫോഴ്സ്മെന്റ് ഡയറക്ടറേറ്റിന്റെ കൂടുതൽ കണ്ടെത്തലുകൾ. കഴിഞ്ഞ മെയ് മാസം 27ന് വീണയുടെയും സിഎംആർഎൽ പ്രൊമോട്ടർമാരുടെയും ഓഫീസുകളിലും വസതികളിലും ഇഡി നടത്തിയ പരിശോധനകളുടെ അടിസ്ഥാനത്തിലാണ് പുതിയ വിവരങ്ങൾ പുറത്തുവിട്ടിരിക്കുന്നത്. വീണ ദുബായിലേക്ക് 85 ലക്ഷം രൂപ അയച്ചതായും ഇതുസംബന്ധിച്ച രേഖകൾ വീണയുടെ ഡയറിയിൽ നിന്ന് കണ്ടെടുത്തിട്ടുണ്ടെന്നും ഇഡി വാർത്താക്കുറിപ്പിൽ അറിയിച്ചു.

വീണയുടെ ഡയറിയിൽ ആകെ 20 കോടിയുടെ ഇടപാട് വിവരങ്ങളാണ് ഉണ്ടായിരുന്നതെന്നും ഔദ്യോഗിക വരുമാനത്തേക്കാൾ വലിയ തോതിലുള്ള സാമ്പത്തിക ഇടപാടുകൾ നടന്നിട്ടുണ്ടെന്നും അന്വേഷണത്തിൽ കണ്ടെത്തിയിട്ടുണ്ട്. ഇതിനുപുറമേ, വൈഫൈ ഉപയോഗിക്കുന്നതിനായി മറ്റൊരാളുടെ പേരിൽ വീണയ്ക്ക് വ്യാജ സിം കാർഡ് ഉണ്ടായിരുന്നതായും ഇഡി പറയുന്നു. ഇന്റർനെറ്റ് കോളുകൾക്ക് വേണ്ടിയാണ് ഇത് ഉപയോഗിച്ചതെന്നാണ് സംശയിക്കുന്നത്. ഈ സിം കാർഡ് നൽകിയ വ്യക്തിയും നിലവിൽ അന്വേഷണ പരിധിയിലാണുള്ളത്.

ഹവാല ഇടപാടുകൾ നടന്നിട്ടുണ്ടെന്നും കേസിൽ ആവശ്യമായ തുടർനടപടികളിലേക്ക് ഉടൻ കടക്കുമെന്നും ഇഡി വ്യക്തമാക്കിയിട്ടുണ്ട്. സ്ഥിരമായ മറ്റ് വലിയ വരുമാനമാർഗ്ഗങ്ങളില്ലാത്ത വീണയുടെ അക്കൗണ്ടുകളിലൂടെ കോടികളുടെ ഇടപാടുകൾ നടന്നിട്ടുണ്ടെന്നാണ് ഇഡിയുടെ വിലയിരുത്തൽ. വീണയുടെ പണമിടപാടുകളുമായി ബന്ധപ്പെട്ട വ്യക്തികളെയും സ്ഥാപനങ്ങളെയും കേന്ദ്രീകരിച്ചാണ് ഈ ദിവസങ്ങളിൽ റെയ്ഡുകളും അന്വേഷണങ്ങളും പുരോഗമിക്കുന്നത്.