തൃശ്ശൂരിലെ സഹകരണ ബാങ്കുകളിലെ ഇഡി റെയ്ഡ് അവസാനിച്ചു ; 17 മണിക്കൂർ നീണ്ട പരിശോധന അവസാനിച്ചത് പുലർച്ചെ രണ്ട് മണിക്ക്

തൃശ്ശൂർ: കരുവന്നൂർ സഹകരണ ബാങ്ക് തട്ടിപ്പ് കേസുമായി ബന്ധപ്പെട്ട് തൃശ്ശൂരിലെ സഹകരണ ബാങ്കുകളിൽ ഇ.ഡി നടത്തിയ റെയ്ഡ് അവസാനിച്ചു. ഇന്നലെ രാവിലെ തുടങ്ങിയ റെയ്ഡ് ഇന്ന് പുലർച്ചെ രണ്ട് മണിയോടെയാണ് അവസാനിച്ചത്. 17 മണിക്കൂറോളമാണ് ഇവിടെ ഇ.ഡിയുടെ പരിശോധന നീണ്ടത്.

കരുവന്നൂർ സഹകരണ ബാങ്ക് തട്ടിപ്പ് കേസിലെ പ്രധാനപ്രതി സതീശ് കുമാറിന് ബിനാമി ഇടപാടുകൾ ഉണ്ടെന്ന് കണ്ടെത്തിയ അയ്യന്തോൾ സഹകരണ ബാങ്ക്, തൃശ്ശൂർ സഹകരണ ബാങ്ക് എന്നിവിടങ്ങളിലാണ് പ്രധാനമായും പരിശോധന നടന്നത്. അയ്യന്തോൾ സഹകരണ ബാങ്കിൽ റെയ്ഡ് ഇപ്പോഴും തുടരുകയാണ്. അതേസമയം, തൃശ്ശൂർ സഹകരണ ബാങ്ക് പ്രസിഡന്റും സിപിഎം സംസ്ഥാന സമിതി അംഗവുമായ എംകെ കണ്ണനെയും പരിശോധനയുടെ ഭാഗമായി കഴിഞ്ഞ ദിവസം വിളിച്ച് വരുത്തിയിരുന്നു. ഇ.ഡി ബാങ്കിലെ അക്കൗണ്ടിലെ വിവരങ്ങള്‍ തേടുകയാണ് ചെയ്യുന്നതെന്ന് കണ്ണന്‍ പറഞ്ഞു. സതീശന്റെ അക്കൗണ്ടുകളുടെ വിവരങ്ങള്‍ തേടിയെന്നും അയ്യായിരത്തിലധികം അക്കൗണ്ടുകളുടെ വിവരങ്ങള്‍ ഇ.ഡി കൊണ്ടു പോയെന്നും കണ്ണൻ വ്യക്തമാക്കി.