പിടിമുറുക്കി ഇഡി ! മാസപ്പടിക്കേസിൽ പിണറായി വിജയന്റെയും മുഹമ്മദ് റിയാസിന്റെയും വസതികളിൽ ഉൾപ്പെടെ കേരളത്തിലെ 12 ഇടങ്ങളിൽ മിന്നൽ പരിശോധന

തിരുവനന്തപുരം/കണ്ണൂർ: മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയൻ, മുൻ പൊതുമരാമത്ത് വകുപ്പ് മന്ത്രി മുഹമ്മദ് റിയാസ് എന്നിവരുടെ വസതികളിൽ എൻഫോഴ്സ്മെന്റ് ഡയറക്ടറേറ്റിന്റെ മിന്നൽ റെയ്‌ഡ്‌. ഏറെ വിവാദമായ എക്സാലോജിക് – സിഎംആർഎൽ സാമ്പത്തിക ഇടപാടുമായി ബന്ധപ്പെട്ട കള്ളപ്പണം വെളുപ്പിക്കൽ കേസിലാണ് ഇഡിയുടെ ഈ നിർണ്ണായക നടപടി. പിണറായി വിജയന്റെ തിരുവനന്തപുരം ബേക്കറി ജംഗ്ഷനിലുള്ള വാടക വീട്ടിലും മുഹമ്മദ് റിയാസിന്റെ കോഴിക്കോട് കോട്ടൂളിയിലുള്ള വസതിയിലുമുൾപ്പെടെ സംസ്ഥാനത്തുടനീളം 12 കേന്ദ്രങ്ങളിലാണ് ഒരേസമയം കേന്ദ്ര ഏജൻസി റെയ്ഡ് നടത്തുന്നത്.

പിണറായി വിജയന്റെ മകൾ വീണാ വിജയന്റെ ഉടമസ്ഥതയിലുള്ള ഐടി കമ്പനിയായ എക്സാലോജിക് സൊല്യൂഷൻസിന് കൊച്ചിൻ മിനറൽസ് ആൻഡ് റൂട്ടൈൽ ലിമിറ്റഡ് (സിഎംആർഎൽ) എന്ന സ്വകാര്യ കമ്പനി സേവനങ്ങളൊന്നും ലഭ്യമാക്കാതെ 1.72 കോടി രൂപ നിയമവിരുദ്ധമായി നൽകിയെന്നതാണ് കേസിലെ പ്രധാന ആരോപണം. വരുമാന നികുതി വകുപ്പിന്റെ മുൻകാല കണ്ടെത്തലുകളെ അടിസ്ഥാനമാക്കി കള്ളപ്പണം വെളുപ്പിക്കൽ നിരോധന നിയമപ്രകാരം (പിഎംഎൽഎ) ഇഡി രജിസ്റ്റർ ചെയ്ത കേസിലാണ് ഇപ്പോഴത്തെ അപ്രതീക്ഷിത നീക്കം. റെയ്ഡ് നടക്കുന്ന സമയത്ത് പ്രതിപക്ഷ നേതാവ് പിണറായി വിജയനും മകൾ വീണാ വിജയനും തിരുവനന്തപുരത്തെ വസതിയിലുണ്ടെന്നാണ് ലഭ്യമാകുന്ന സൂചനകൾ.

കേസുമായി ബന്ധപ്പെട്ട് ഇഡി നൽകിയ സമൻസുകളും അന്വേഷണ നടപടികളും റദ്ദാക്കണമെന്ന് ആവശ്യപ്പെട്ട് സിഎംആർഎൽ അധികൃതർ നൽകിയ ഹർജി കഴിഞ്ഞ ദിവസം കേരള ഹൈക്കോടതി തള്ളിയിരുന്നു. ഇഡിയുടെ അന്വേഷണവുമായി മുന്നോട്ട് പോകാമെന്ന കോടതി ഉത്തരവ് പുറത്തുവന്ന് തൊട്ടടുത്ത ദിവസമാണ് അതീവ രഹസ്യമായി കേന്ദ്ര ഏജൻസി ഈ നീക്കം നടത്തിയത്. കൈക്കൂലി, കള്ളപ്പണം വെളുപ്പിക്കൽ, നികുതി വെട്ടിപ്പ് എന്നിവയടക്കമുള്ള അതീവ ഗുരുതരമായ ആരോപണങ്ങളാണ് നിലവിൽ സിഎംആർഎല്ലിനും എക്സാലോജിക്കിനുമെതിരെ ഇഡി അന്വേഷിക്കുന്നത്.