ശത്രുക്കൾ വിറയ്ക്കും ! ഭാരതം കുതിക്കും !ഇന്ത്യൻ നാവികസേനക്ക് കരുത്തേകി ഐഎൻഎസ് ഹിമഗിരിയും ഉദയഗിരിയും കമ്മീഷൻ ചെയ്തു; പ്രതിരോധമേഖലയിൽ നിർണായക മുന്നേറ്റം

ദില്ലി : പ്രതിരോധമേഖലയിൽ ഇന്ത്യയുടെ സ്വാശ്രയത്വത്തിന് പുതിയ ഊർജ്ജം പകർന്ന് ഇന്ത്യൻ നാവികസേനക്ക് കരുത്തേകിക്കൊണ്ട് രണ്ട് അത്യാധുനിക യുദ്ധക്കപ്പലുകൾ കൂടി കമ്മീഷൻ ചെയ്തു. രാജ്യം തദ്ദേശീയമായി നിർമ്മിച്ച ഐഎൻഎസ് ഹിമഗിരിയും (INS Himgiri) ഐഎൻഎസ് ഉദയഗിരിയും (INS Udaygiri) കേന്ദ്ര പ്രതിരോധമന്ത്രി രാജ്നാഥ് സിംഗിന്റെ സാന്നിധ്യത്തിൽ നാവികസേനയുടെ ഭാഗമായി. പ്രോജക്ട് 17 ആൽഫയുടെ (P-17A) ഭാഗമായ നീലഗിരി ക്ലാസ് സ്റ്റെൽത്ത് ഫ്രിഗേറ്റുകളാണ് ഈ രണ്ട് യുദ്ധക്കപ്പലുകളും. ഒരേ സമയം രണ്ട് പ്രമുഖ യുദ്ധക്കപ്പലുകൾ കമ്മിഷൻ ചെയ്യുന്നത് രാജ്യചരിത്രത്തിൽ ഇതാദ്യമായാണ്.

കപ്പലുകളുടെ 75% ഭാഗങ്ങളും രാജ്യത്തിനകത്ത് തന്നെ നിർമ്മിച്ചവയാണ്. കൊൽക്കത്തയിലെ ഗാർഡൻ റീച്ച് ഷിപ്ബിൽഡേഴ്സ് & എൻജിനീയേഴ്സ് ആണ് ഐഎൻഎസ് ഹിമഗിരി നിർമ്മിച്ചത്. അതേസമയം, മുംബൈയിലെ മസഗോൺ ഡോക്ക് ഷിപ്ബിൽഡേഴ്സ്ആണ് ഐഎൻഎസ് ഉദയഗിരിക്ക് രൂപം നൽകിയത്. നാവികസേനയുടെ വാർഷിപ്പ് ഡിസൈൻ ബ്യൂറോ (WDB) ആണ് ഈ രണ്ട് കപ്പലുകളുടെയും രൂപകൽപ്പന നിർവഹിച്ചത്.

മുൻകാല ഡിസൈനുകളെ അപേക്ഷിച്ച് കൂടുതൽ നൂതന സാങ്കേതികവിദ്യകളും മികച്ച രൂപകൽപ്പനയും ഈ കപ്പലുകൾക്കുണ്ട്. ഏകദേശം 6,700 ടൺ ഭാരമുള്ള ഇവ ശിവാലിക് ക്ലാസ് ഫ്രിഗേറ്റുകളേക്കാൾ വലുതും കൂടുതൽ ആകർഷകമായ രൂപകൽപ്പനയോട് കൂടിയതുമാണ്. കുറഞ്ഞ റഡാർ ക്രോസ് സെക്ഷൻ (radar cross-section) ഇവയെ ശത്രുറഡാറുകളിൽ നിന്ന് മറയ്ക്കാൻ സഹായിക്കുന്നു. ഡീസൽ എൻജിനുകളും ഗ്യാസ് ടർബൈനുകളും സംയോജിപ്പിച്ചുള്ള പ്രവർത്തനമാണ് ഇവക്ക് ഊർജ്ജം നൽകുന്നത്.

ഈ യുദ്ധക്കപ്പലുകളിൽ സൂപ്പർസോണിക് സർഫേസ്-ടു-സർഫേസ് മിസൈലുകൾ, ഇടത്തരം ദൂരപരിധിയുള്ള സർഫേസ്-ടു-എയർ മിസൈലുകൾ, 76 എംഎം എംആർ ഗൺ, കൂടാതെ 30 എംഎം, 12.7 എംഎം ക്ലോസ്-ഇൻ വെപ്പൺ സിസ്റ്റങ്ങൾ എന്നിവ ഉൾപ്പെടെയുള്ള അത്യാധുനിക ആയുധങ്ങൾ സജ്ജീകരിച്ചിരിക്കുന്നു. അന്തർവാഹിനി ആക്രമണങ്ങളെ നേരിടാനുള്ള സംവിധാനങ്ങളും ഇവയിലുണ്ട്. ഏതൊരു സമുദ്ര ദൗത്യവും നിർവഹിക്കാൻ ശേഷിയുള്ള ഈ കപ്പലുകൾ കിഴക്കൻ കപ്പൽ പടയുടെ (Eastern Fleet) ഭാഗമാകും.

പ്രോജക്ട് 17 ആൽഫയിൽ നിർമ്മിക്കുന്ന ഏഴ് സ്റ്റെൽത്ത് ഫ്രിഗേറ്റുകളിൽ ഒന്നാണ് ഈ കപ്പലുകൾ. ഈ ശ്രേണിയിലെ ആദ്യ കപ്പലായ ഐഎൻഎസ് നീലഗിരി ഈ വർഷമാദ്യം കമ്മിഷൻ ചെയ്തിരുന്നു. ഇതോടെ മൂന്ന് ഫ്രിഗേറ്റുകളുള്ള ഒരു സ്ക്വാഡ്രൺ (squadron) ഇന്ത്യക്ക് സ്വന്തമായി. അടുത്തിടെ ഡീകമ്മിഷൻ ചെയ്ത മുൻഗാമികളായ യുദ്ധക്കപ്പലുകളുടെ പേരാണ് ഹിമഗിരിക്കും ഉദയഗിരിക്കും നൽകിയിരിക്കുന്നത്. കൂടാതെ, വാർഷിപ്പ് ഡിസൈൻ ബ്യൂറോയുടെ നൂറാമത്തെ കപ്പൽ എന്ന പ്രത്യേകതയും ഉദയഗിരിക്കുണ്ട്.