എൻജിൻ തകരാർ; ദില്ലിയിൽ നിന്ന് ചെന്നൈയിലേക്ക് പുറപ്പെട്ട ഇൻഡിഗോ വിമാനം അടിയന്തരമായി തിരിച്ചിറക്കി

ദില്ലി: ദില്ലിയിൽ നിന്നും ചെന്നൈയിലേക്ക് പുറപ്പെട്ട ഇൻഡിഗോ വിമാനം അടിയന്തരമായി തിരിച്ചിറക്കി. ഒരു മണിക്കുറിന് ശേഷമാണ് ദില്ലിയിൽ തന്നെ വിമാനം തിരിച്ചിറക്കിയത്. രാത്രി 10.39ഓടെയായിരുന്നു വിമാനം ദില്ലി വിമാനത്താവളത്തിലെത്തിയത്.

6E-2789 എന്ന നമ്പറിലുള്ള എയർബസ് എ321നിയോ വിമാനം 230 യാത്രക്കാരുമായാണ് ദില്ലി വിമാനത്താവളത്തിൽ നിന്നും പറന്നുയർന്നത്. എൻജിൻ തകരാർ ശ്രദ്ധയിൽപ്പെട്ടതിന് മിനിറ്റുകൾക്കകം തന്നെ തിരിച്ച് പറക്കുകയായിരുന്നു. തുടർന്ന് ഒരു മണിക്കൂറിന് ശേഷം ദില്ലിയിൽ തന്നെ തിരിച്ചിറക്കി.
9.46നാണ് ദില്ലിയിൽ നിന്നും വിമാനം യാത്രതിരിച്ചത്. ചെന്നൈയിൽ 12.24നായിരുന്നു വിമാനം ലാൻഡ് ചെയ്യേണ്ടിയിരുന്നത്. നേരത്തെ ദില്ലിയിൽ നിന്നും യു.എസിലേക്ക് പറന്ന എയർ ഇന്ത്യ വിമാനം എൻജിൻ തകരാറിനെ തുടർന്ന് റഷ്യയിലിറക്കിയിരുന്നു.