സഹപ്രവർത്തകരുടെ യാത്രയയപ്പ്; സ്വീകരണ സ്ഥലത്തേക്ക് നടക്കവേ അദ്ധ്യാപിക കുഴഞ്ഞുവീണു മരിച്ചു

തിരുവനന്തപുരം : സഹപ്രവര്‍ത്തകര്‍ നൽകിയ യാത്രയയപ്പ് സല്‍ക്കാരത്തില്‍ പങ്കെടുക്കാന്‍ എത്തിയ അദ്ധ്യാപിക കുഴഞ്ഞുവീണു മരിച്ചു. വെഞ്ഞാറമൂട് പിരപ്പന്‍കോട് ഗവ. വൊക്കേഷനൽ ഹയര്‍ സെക്കൻഡറി സ്‌കൂളിലെ ഹയർ സെക്കൻഡറി വിഭാഗം ഇക്കണോമിക്സ് അദ്ധ്യാപികയും കാരേറ്റ് പേടികുളം ശീമവിള വീട്ടിൽ വേണുകുമാറിന്റെ (കെഎസ്ഇബി) ഭാര്യയുമായ വി.ഐ.മിനി (56) ആണ് കുഴഞ്ഞു വീണുമരിച്ചത്.

ഈ മാസം 31നാണ് സർവീസിൽനിന്ന് വിരമിക്കേണ്ടിയിരുന്നതിനാൽ സഹപ്രവർത്തകർ ഇന്ന് അദ്ധ്യാപികയ്ക്ക് യാത്രയയപ്പ് നൽകാൻ തീരുമാനിക്കുകയായിരുന്നു. ഇന്നുച്ചയ്യ്ക്ക് 12.30 ഓടെ വെഞ്ഞാറമൂട്ടിലെ ഭക്ഷണശാലയില്‍ സംഘടിപ്പിച്ച ചടങ്ങില്‍ പങ്കെടുക്കാന്‍ കാറില്‍ എത്തി സ്വീകരണ സ്ഥലത്തേക്ക് നടന്നു പോകവേ അദ്ധ്യാപിക കുഴഞ്ഞുവീഴുകയായിരുന്നു. ഉടനടി സമീപത്തെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മക്കൾ: ജയശങ്കർ (പോളിടെക്നിക് വിദ്യാർത്ഥി , ഇന്ദുജ (ഡിഗ്രി വിദ്യാർത്ഥിനി).