ഇനി ഭയക്കേണ്ട! അഞ്ചു വര്‍ഷത്തിനിടെ 11 തവണ അരികൊമ്പൻ തകർത്ത റേഷന്‍കട വീണ്ടും പുതുക്കിപണിതു; പ്രവര്‍ത്തനം ഉടൻ ആരംഭിക്കും

ഇടുക്കി: ചിന്നക്കനാലിൽ അഞ്ചു വര്‍ഷത്തിനിടെ 11 തവണ അരിക്കൊമ്പന്‍ തകര്‍ത്ത റേഷന്‍കട വീണ്ടും പുതുക്കിപണിതു. പ്രവർത്തനം ഉടൻ ആരംഭിക്കും. കൊമ്പന്റെ നിരന്തര ആക്രമണത്തെ തുടര്‍ന്ന് ലയത്തിലെ ഒരു മുറിയിലായിരുന്നു റേഷന്‍കട നടത്തിയിരുന്നത്. 2023ല്‍ അഞ്ചു തവണയാണ് ഈ റേഷന്‍കട അരിക്കൊമ്പന്‍ തകര്‍ത്തത്.

2018 മുതല്‍ 11 തവണയാണ് റേഷന്‍കട ആക്രമിച്ച് തകര്‍ത്ത് അരിക്കൊമ്പന്‍ അരി എടുത്ത് കഴിക്കുകയും ചെയ്തിരുന്നത്. വലിയ ആശങ്കയായിരുന്നു അരിക്കൊമ്പന്‍ ഉയര്‍ത്തിയിരുന്നത്. അരിക്കൊമ്പനെ മാറ്റിയതിന് പിന്നാലെ എച്ച്എംഎല്‍ കമ്പനി പുതുക്കിപണിതു നല്‍കുകയായിരുന്നു. ഏഴു എട്ടുമാസമായി താത്കാലികമായി റേഷന്‍കട ലയത്തിലാണ് പ്രവര്‍ത്തിച്ചുകൊണ്ടിരുന്നത്. ആനയുടെ ആക്രമണം ഭയക്കാതെ റേഷന്‍കട നടത്താന്‍ കഴിയുമെന്ന് റേഷന്‍കട നടത്തിപ്പുകാരന്‍ പറഞ്ഞു. പുതിയ റേഷന്‍കട വന്നതോടെ നാട്ടുകാര്‍ക്കും വലിയൊരു ആശ്വാസം ഉണ്ടാകുന്നുണ്ട്.