മത പീഡനങ്ങളിൽ മനം മടുത്തു ! പ്രാണരക്ഷാർത്ഥം ഇന്ത്യയിലെത്തിയ 12 ബംഗ്ലാദേശി ഹിന്ദു അഭയാർത്ഥികൾക്ക് പൗരത്വം നൽകി കേന്ദ്രസർക്കാർ

ദില്ലി : മതപരമായ പീഡനങ്ങളിൽ നിന്നും അതിക്രമങ്ങളിൽ നിന്നും രക്ഷപ്പെട്ട് ബംഗ്ലാദേശിൽ നിന്ന് ഇന്ത്യയിലെത്തിയ 12 ഹിന്ദു അഭയാർത്ഥികൾക്ക് ഇന്ത്യൻ പൗരത്വം നൽകി കേന്ദ്രസർക്കാർ. വീടും, സമ്പാദ്യവും ഉപേക്ഷിച്ച് ജീവനും കൊണ്ട് രക്ഷപെട്ട് വന്നവർക്കാണ് ഭാരതം അഭയം നൽകിയത്. ഭാരതം തങ്ങളുടെ സുരക്ഷിത ഭവനമാണെന്ന് വിശ്വസിച്ച് വീടില്ലാതെ, ഭൂമിയില്ലാതെ, രേഖകളൊന്നുമില്ലാതെ അതിർത്തി കടന്ന കുടുംബങ്ങളാണിവർ. നാദിയ, കൂച്ച് ബെഹാർ തുടങ്ങിയ ജില്ലകളിലെ CAA പിന്തുണാ കേന്ദ്രങ്ങൾ വഴി ഇവർ ഇന്ത്യൻ പൗരത്വത്തിന് അപേക്ഷ സമർപ്പിച്ചിരുന്നു.

പൗരത്വം ഇല്ലാത്തതിനാൽ ഇന്ത്യയിൽ എത്തിയതിന് ശേഷം, ഇവർക്ക് സ്ഥിരം ജോലികൾക്ക് അപേക്ഷിക്കാനോ പാസ്‌പോർട്ടുകൾ നേടാനോ അടിസ്ഥാന സേവനങ്ങൾ ലഭ്യമാക്കാമോ ചെയ്യാനോ കഴിഞ്ഞിരുന്നില്ല. സംസ്ഥാനത്തെ ഏറ്റവും വലിയ അഭയാർത്ഥി സമൂഹങ്ങളിലൊന്നായ മതുവകൾ ഈ തീരുമാനത്തെ വളരെയധികം ആശ്വാസത്തോടെ സ്വാഗതം ചെയ്തു. പശ്ചിമ ബംഗാളിലെ രാഷ്‌ട്രീയ അഭിപ്രായവ്യത്യാസങ്ങൾ അവരുടെ പൗരത്വം വൈകിപ്പിച്ചിരുന്നു .അവർക്ക് ആവശ്യമായ രേഖകൾ നൽകുന്നതിനെ തൃണമൂൽ , സിപിഎം, കോൺഗ്രസ് നേതാക്കൾ എതിർത്തിരുന്നു.

കഴിഞ്ഞ രണ്ട് മാസത്തിനിടെ അതിർത്തി ജില്ലകളിൽ ബിജെപി തുറന്ന ഹെൽപ്പ് ഡെസ്കുകളിൽ നിന്നും ക്യാമ്പുകളിൽ നിന്നുമാണ് ഇവർക്ക് സഹായം ലഭിക്കുന്നത്. നാദിയ, കൂച്ച് ബെഹാർ, മറ്റ് പ്രദേശങ്ങൾ എന്നിവിടങ്ങളിലെ ക്യാമ്പുകൾ ആയിരക്കണക്കിന് അഭയാർത്ഥികൾക്ക് CAA ഫോമുകൾ പൂരിപ്പിക്കുന്നതിനും വിശദാംശങ്ങൾ പരിശോധിക്കുന്നതിനും പേപ്പർ വർക്കുകൾ പൂർത്തിയാക്കുന്നതിനും സഹായിച്ചിട്ടുണ്ട്.