ഫെഞ്ചല്‍ കരതൊട്ടു ! തമിഴ്‌നാട്ടിൽ വ്യാപകമഴ ; മഴക്കെടുതിയിൽ 2 മരണം ! ആന്ധ്രാ തീരത്തും ജാഗ്രതാ നിർദ്ദേശം

ഫെഞ്ചല്‍ ചുഴലിക്കാറ്റ് കരതൊട്ടതോടെ തമിഴ്നാട്ടിലെ വിവിധ ജില്ലകളില്‍ അതിശക്തമായ മഴ. ഇന്ന് വൈകുന്നേരത്തോടെ പുതുച്ചേരിക്കടുത്താണ് ചുഴലിക്കാറ്റ് കരതൊട്ടത്. കാറ്റിന്റെ വേഗത വരുന്ന മൂന്ന് മണിക്കൂറിനുള്ളില്‍ വര്‍ധിക്കുമെന്നും ബന്ധപ്പെട്ടവര്‍ അറിയിച്ചു. ഇതോടെ ചെന്നൈ വിമാനത്താവളം നാളെ പുലർച്ചെ നാല് മണിവരെ അടച്ചിടാന്‍ അധികൃതര്‍ തീരുമാനിച്ചു.ചെന്നൈ നഗരത്തിന്റെ വിവിധയിടങ്ങളിൽ വെള്ളക്കെട്ട് രൂപപ്പെട്ടിട്ടുണ്ട്. രണ്ട് പേർ വൈദ്യുതാഘാതമേറ്റ് മരിച്ചു. ഒരു ഉത്തർപ്രദേശ് സ്വദേശിയും മരിച്ചവരിൽ ഉൾപ്പെടുന്നു. എടിഎമ്മിൽ നിന്ന് പണം എടുക്കാൻ പോകവെയാണ് ഉത്തർപ്രദേശ് സ്വദേശി അപകടത്തിൽപ്പെട്ടത്. ആന്ധ്രാ തീരത്തും ജാഗ്രതാ നിർദ്ദേശം പുറപ്പെടുവിപ്പിച്ചു.

ചെന്നൈക്ക് പുറമെ തിരുവള്ളൂര്‍, കാഞ്ചീപുരം, കള്ളക്കുറിച്ചി, കൂടലൂര്‍ ജില്ലകളില്‍ ശക്തമായ മഴയാണ്. ചെന്നൈയില്‍ പല റോഡുകളും വെള്ളത്തില്‍ മുങ്ങി. ഇതില്‍ത്തന്നെ റാണിപേട്ട്, തിരുവണ്ണാമലൈ, വെല്ലൂര്‍, പെരമ്പലൂര്‍, അരിയല്ലൂര്‍, തഞ്ചാവൂര്‍, തിരുവാരൂര്‍, മയിലാടുതുറെ, നാഗപട്ടണം എന്നിവിടങ്ങളില്‍ ഒറ്റപ്പെട്ട അതിശക്തമായ മഴ മുന്നറിയിപ്പുമുണ്ട്. മണ്ണിടിച്ചലിനടക്കമുള്ള സാധ്യതയും കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നുണ്ട്.