തദ്ദേശ തെരഞ്ഞെടുപ്പിനുള്ള അന്തിമ വോട്ടർപട്ടിക ; ഈ മാസം 30 വരെ തദ്ദേശ സ്ഥാപനങ്ങള്‍ക്ക് അവധിയില്ല, നിര്‍ദേശവുമായി തെരഞ്ഞെടുപ്പ് കമ്മീഷന്‍

തിരുവനന്തപുരം: സംസ്ഥാനത്ത് തദ്ദേശ തെരഞ്ഞെടുപ്പിനുള്ള അന്തിമ വോട്ടർപട്ടിക പ്രസിദ്ധീകരിക്കുന്നതിനുള്ള നടപടികൾ വേഗത്തിലാക്കി. ഇത് സംബന്ധിച്ച ജോലികൾ പൂർത്തിയാക്കുന്നതിനായി ഈ മാസം 30 വരെ തദ്ദേശ സ്ഥാപനങ്ങൾക്ക് അവധി നൽകേണ്ടതില്ലെന്ന് സംസ്ഥാന തിരഞ്ഞെടുപ്പ് കമ്മീഷൻ നിർദ്ദേശിച്ചു. വോട്ടർപട്ടികയുമായി ബന്ധപ്പെട്ട എല്ലാ ജോലികളും പൂർത്തീകരിക്കാൻ അ വധി ഒഴിവാക്കി തുറന്നു പ്രവര്‍ത്തിക്കണമെന്ന് ഗ്രാമപഞ്ചായത്തുകളോടും നഗരസഭാ ഓഫീസുകളോടും സംസ്ഥാന തെരഞ്ഞെടുപ്പ് കമ്മീഷൻ നിര്‍ദ്ദേശിച്ചു. ഈ മാസം 30-ന് അന്തിമ വോട്ടർപട്ടിക പ്രസിദ്ധീകരിക്കാനാണ് നിലവിലെ തീരുമാനം.

അന്തിമവോട്ടർ പട്ടിക പ്രസിദ്ധീകരിക്കുന്നതിന് മുന്നോടിയായി പേര് ചേർക്കാൻ അപേക്ഷിച്ചവരുടെ ഹിയറിംഗ്, മറ്റ് അനുബന്ധ ജോലികൾ എന്നിവ പൂർത്തിയാക്കുന്നതിനാണ് അവധി ഒഴിവാക്കിയത്. ജൂലൈ 23-ന് പുറത്തിറക്കിയ കരട് വോട്ടർപട്ടികയിൽ പുതുതായി പേര് ചേർക്കുന്നതിനായി 29.81 ലക്ഷത്തിലധികം അപേക്ഷകളാണ് ലഭിച്ചത്. ഇതിനു പുറമെ, തിരുത്തലുകൾ, സ്ഥാനമാറ്റം, പേര് ഒഴിവാക്കൽ എന്നിവയ്ക്കായി 35.98 ലക്ഷം അപേക്ഷകളും ആകെ ലഭിച്ചിട്ടുണ്ട്.