സ്വരാജ് റൗണ്ടില്‍ നിന്ന് വെടിക്കെട്ട് കാണാന്‍ അനുമതിയില്ല, സുപ്രീം കോടതിയുടെ നിര്‍ദ്ദേശം അനുസരിക്കണം: വരാൻ പോകുന്ന പൂരങ്ങളിൽ അടുത്ത് നിന്ന് വെടിക്കെട്ട് കാണാൻ സംവിധാനമൊരുക്കും; സുരേഷ് ​ഗോപി

തൃശൂർ: തൃശൂര്‍ പൂരത്തിനായി നഗരം ഒരുങ്ങി കഴിഞ്ഞു. പൂരത്തിനോടനുബന്ധിച്ചുള്ള സാമ്പിള്‍വെടിക്കെട്ടിന്, രാത്രി 7മണിക്ക് പാറമേക്കാവ് ദേവസ്വവും 8 മണിക്ക് തിരുവമ്പാടി ദേവസ്വവും വെടിക്കെട്ടിന് തിരി കൊളുത്തും. ഒരുക്കങ്ങളെല്ലാം പൂർത്തിയായി.

എന്നാൽ സ്വരാജ് റൗണ്ടില്‍നിന്ന് വെടിക്കെട്ട് കാണാന്‍ അനുമതിയില്ല. സുപ്രീം കോടതിയുടെ നിര്‍ദ്ദേശം എല്ലാവരും അനുസരിക്കണമെന്ന് ബിജെപി നേതാവും നടനുമായ സുരേഷ് ഗോപി പറഞ്ഞു. സുപ്രിംകോടതി തന്നെ തൃശൂർ പൂരത്തിന്റെ വെടിക്കെട്ടിന് നിയന്ത്രണങ്ങൾ വേണമെന്ന് പറയുന്നതിനാൽ ഇത്തവണ ഒന്നും ചെയ്യാൻ കഴിയില്ലെന്നും ഇനി വരാൻ പോകുന്ന പൂരങ്ങളിൽ സുരക്ഷ ഉറപ്പാക്കി അടുത്ത് നിന്ന് വെടിക്കെട്ട് കാണാനുള്ള സംവിധാനമൊരുക്കുമെന്നും സുരേഷ് ​ഗോപി എം.പി.

എല്ലാ വര്‍ഷവും ഇത് തുടര്‍ന്നു പോകേണ്ടതല്ലേ, ഒരു ജീവഹാനിയും സംഭവിക്കാതെ നല്ല രീതിയില്‍ തുടരണ്ടതല്ലേ, സുരക്ഷിതമായ സ്ഥലങ്ങളില്‍ നിന്നും എല്ലാവരും വെടിക്കെട്ട് കാണണമെന്ന് സുരേഷ് ഗോപി പറഞ്ഞു.

അതേസമയം അടുത്ത വര്‍ഷം സുരക്ഷാ മാനദണ്ഡങ്ങള്‍ കൂട്ടി സംവിധാനങ്ങള്‍ ഒരുക്കണമെന്നും, ഉള്ള സൗകര്യത്തില്‍ എല്ലാവരും പൂരം ആസ്വദിക്കണമെന്നും, സുരേഷ് ഗോപി പറഞ്ഞു. ഷൂട്ടിംഗ് തിരക്കുകള്‍ ഉള്ളതിനാല്‍ പൂരത്തിന് പങ്കെടുക്കാനാകില്ലെന്നും സുരേഷ് ഗോപി അറിയിച്ചു. ഷൂട്ടിംഗ് ഉള്ളതിനാലാണ് കെ. സുരേന്ദ്രന്റെ മകന്റെ കല്യാണത്തിനും പങ്കെടുക്കാഞ്ഞത്. താന്‍ വിളിച്ച് അറിയിച്ചിരുന്നുവെന്നും സുരേഷ് ഗോപി പറഞ്ഞു.

പൂരം പ്രമാണിച്ച് മിക്ക ട്രെയിനുകൾക്കും പൂങ്കുന്നം സ്റ്റേഷനിൽ സ്റ്റോപ്പ്‌ അനുവദിച്ചിട്ടുണ്ട്. തിരുവമ്പാടിയുടെ ചമയ പ്രദർശനം റവന്യൂ മന്ത്രി കെ രാജൻ ഉദ്ഘാടനം ചെയ്യും. പാറമേക്കാവിന്‍റെ ചമയപ്രദർശനം സുരേഷ് ഗോപി ഉദ്ഘാടനം ചെയ്യും.