സൽമാൻ ഖാന്റെ വസതിക്ക് മുന്നിലെ വെടിവയ്പ്പ്; ലോറൻസ് ബിഷ്ണോയിയെ പ്രതി ചേർത്തു; ഗുണ്ടാസംഘത്തെ കസ്റ്റഡിയിൽ ആവശ്യപ്പെട്ട് ക്രൈംബ്രാഞ്ച്

മുംബൈ: ബോളിവുഡ് നടൻ സൽമാൻ ഖാന്റെ വസതിക്ക് മുന്നിൽ വെടിയുതിർത്ത കേസിൽ ​ഗുണ്ടാനേതാവ് ലോറൻസ് ബിഷ്ണോയിയെ പ്രതി ചേർത്തു. ബിഷ്ണോയി സംഘമാണ് ആക്രമണത്തിന് പിന്നില്ലെന്ന് അന്വേഷണ സംഘം കണ്ടെത്തിയിരുന്നു. തുടർന്നാണ് ജയിലിൽ കഴിയുന്ന ലോറൻസ് ബിഷ്ണോയിയെ കേസിൽ പ്രതി ചേർത്തത്. ലോറൻസ് ബിഷ്ണോയിയുടെ സഹോദരൻ അൻമോൽ ബിഷ്ണോയിയുമായി കേസിലെ പ്രതികൾക്ക് നേരിട്ട് ബന്ധമുണ്ടെന്നും അന്വേഷണ സംഘം കണ്ടെത്തിയിട്ടുണ്ട്.

കേസന്വേഷണത്തിൽ ലോറൻസ് ബിഷ്ണോയിക്കെതിരെ തെളിവുകൾ കണ്ടെത്തിയതായി ക്രൈംബ്രാഞ്ച് ഉദ്യോഗസ്ഥർ അറിയിച്ചു. അൻമോൽ ബിഷ്ണോയിക്കെതിരെ ലുക്ക്ഔട്ട് നോട്ടീസ് പുറത്തുവിടുമെന്നും ​ബിഷ്ണോയി സംഘത്തെ കസ്റ്റഡിയിൽ ആവശ്യപ്പെട്ട് കോടതിയിൽ അപേക്ഷ നൽകുമെന്നും അന്വേഷണ സംഘം അറിയിച്ചു. സംഭവത്തിന് പിന്നിൽ ലോറൻസ് ബിഷ്‌ണോയ് സംഘമാണെന്ന് മുംബൈ പോലീസ് നേരത്തെ വ്യക്തമാക്കിയിരുന്നു.

സൽമാന്റെ വസതിക്ക് മുന്നിൽ വെടിയുതിർത്ത രണ്ട് പേരെ പോലീസ് അറസ്റ്റ് ചെയ്തിരുന്നു. സിസിടിവി ദൃശ്യങ്ങൾ കേന്ദ്രീകരിച്ച് നടന്ന അന്വേഷണത്തിലാണ് പ്രതികളെ പിടികൂടിയത്. നടനെതിരെയുള്ള രണ്ടാമത്തെ ആക്രമണമായതിനാൽ കേസ് അന്ന് തന്നെ ക്രൈംബ്രാഞ്ചിന് കൈമാറുകയായിരുന്നു. ആക്രമണത്തിൽ ഗൂഢാലോചന നടത്തിയവരെ കേന്ദ്രീകരിച്ചാണ് ക്രൈംബ്രാഞ്ചിന്റെ തുടരന്വേഷണം നടക്കുന്നത്.