ആദ്യ മന്ത്രിസഭാ യോഗത്തിൽ വാഗ്ദാനങ്ങൾ പാലിച്ച് രണ്ടാം മോദി സർക്കാർ

ദില്ലി: തിരഞ്ഞെടുപ്പ് പ്രകടന പത്രികയിൽ നൽകിയ വാഗ്ദാനങ്ങൾ ആദ്യ മന്ത്രിസഭയിൽ തന്നെ നടപ്പാക്കി കാണിച്ച് രണ്ടാം നരേന്ദ്രമോദി സർക്കാർ. പ്രകടന പത്രികയിലെ നാല് വാഗ്ദാനങ്ങളാണ് ആദ്യ മന്ത്രിസഭാ യോഗത്തിൽ തന്നെ അംഗീകരിച്ച് നടപ്പാക്കാനൊരുങ്ങുന്നത്.

പ്രധാനമന്ത്രി കിസാൻ പദ്ധതിയുടെ പരിധി പൂർണമായും ഒഴിവാക്കിയതാണ് ഇവയിൽ ഏറ്റവും പ്രധാനപ്പെട്ടത്. കർഷകർക്ക് പ്രതിവർഷം ആറായിരം രൂപ ലഭ്യമാക്കുന്ന പദ്ധതിയാണിത്. ഇതോടെ രാജ്യത്തെ എല്ലാ കർഷകർക്കും പദ്ധതിയുടെ ആനുകൂല്യങ്ങൾ ലഭിക്കും.

ഇതോടൊപ്പം രാജ്യത്തെ വ്യാപരികൾക്ക് പ്രതിമാസം 3000 രൂപ പെൻഷൻ നൽകാനുള്ള തീരുമാനവുമുണ്ടായി. മൂന്ന് കോടി ചെറുകിട വ്യാപാരികൾക്ക് ഇതിന്റെ ഗുണഫലങ്ങൾ ലഭ്യമാകും. അറുപത് വയസ്സ് മുതൽ 3000 രൂപ പെൻഷൻ നൽകാനാണ് ലക്ഷ്യമിടുന്നത്.

ഇതിന് പുറമെ കർഷകർക്ക് പ്രതിമാസം 3000 രൂപയുടെ പെൻഷൻ നൽകുന്ന പദ്ധതിക്കും അംഗീകാരമായി. പങ്കാളിത്ത രീതിയിൽ നടപ്പാക്കുന്ന പദ്ധതിയിൽ സർക്കാരിനൊപ്പം കർഷകരും നിശ്ചിത തുക അടക്കണം. 18 മുതൽ 40 വയസ്സുവരെ പ്രായമുള്ളവർക്ക് ഈ പദ്ധതിയിൽ അംഗമാകാം. 60 വയസുമുതലാണ് ഈ പെൻഷനും ലഭ്യമാക്കുക.