തെരഞ്ഞെടുപ്പ് പ്രചാരണത്തിനെത്തിയ രാജീവ് ചന്ദ്രശേഖറോട് സംസ്ഥാന സർക്കാരിന്റെ പിടിപ്പ് കേട് മൂലം തങ്ങൾ അനുഭവിക്കുന്ന ബുദ്ധിമുട്ടുകൾ എണ്ണിപ്പറഞ്ഞ് മത്സ്യത്തൊഴിലാളികൾ ! പ്രശ്നങ്ങൾ പരിഹരിക്കാൻ താൻ കൂടെ ഉണ്ടാകുമെന്ന് എൻഡിഎ സ്ഥാനാർത്ഥിയുടെ ഉറപ്പ്

തെരഞ്ഞെടുപ്പ് പ്രചാരത്തിന്റെ ഭാഗമായി കഴക്കൂട്ടം നിയോജക മണ്ഡലത്തിലെ കരിയം ജംഗ്ഷനിലെത്തിയ എൻഡിഎ സ്ഥാനാർത്ഥിയും കേന്ദ്രമന്ത്രിയുമായ രാജീവ് ചന്ദ്രശേഖറിന് മുന്നിൽ സംസ്ഥാന സർക്കാരിന്റെ പിടിപ്പ് കേട് മൂലം തങ്ങൾ അനുഭവിക്കുന്ന ബുദ്ധിമുട്ടുകൾ എണ്ണിപ്പറഞ്ഞ് മത്സ്യത്തൊഴിലാളികൾ.

“പുലർച്ചെ മീൻചുമടേന്തി ചന്തയിൽ വന്നു മീൻ വിറ്റു മാത്രം ജീവിക്കാൻ പറ്റാത്ത സാഹചര്യമാണ്. സർക്കാർ സഹായങ്ങൾ ഒന്നും തന്നെ കിട്ടുന്നില്ല. സംസ്ഥാന സർക്കാരിന്റെ പരാജയമാണിത്. അവർ ചെയ്യേണ്ടത് ചെയ്യാത്തത് കൊണ്ടാണ് ഇങ്ങനെയൊരു സാഹചര്യം ഉണ്ടായത്.” മത്സ്യത്തൊഴിലാളികളുടെ പ്രശ്നങ്ങൾ ശ്രദ്ധയോടെ കേട്ട ശേഷം രാജീവ് ചന്ദ്രശേഖർ പറഞ്ഞു. പ്രശ്നങ്ങൾ പരിഹരിക്കാൻ താൻ ഉണ്ടാകുമെന്നും അദ്ദേഹം ഉറപ്പ് നൽകി.

രാവിലെ പത്ത് മണിക്ക് കരിയത്തെത്തിയ സ്ഥാനാർത്ഥിയെ വരവേൽക്കാൻ വൻജനാവലിയുണ്ടായിരുന്നു. ചെല്ലമംഗലം വാർഡ് മെമ്പർ സി ഗായത്രി ദേവിയുടെ നേതൃത്വത്തിലുള്ള പ്രവർത്തകർ സ്വീകരിച്ചു. കരിയം ജംഗ്ഷനിലെ മാർക്കറ്റ് സന്ദർശിച്ച അദ്ദേഹത്തോട് കച്ചവടക്കാർ സംസ്ഥാന സർക്കാരിനെതിരെയുള്ള നിരവധി പരാതികളുടെ കെട്ടഴിച്ചു. ആവശ്യ സാധനങ്ങളുടെ വിലക്കയറ്റവും, പെൻഷൻ ലഭിക്കാത്തതുമാണ് പരാതിയിൽ കൂടുതൽ. താൻ വിജയിച്ചാൽ എല്ലാ അടിസ്ഥാന പ്രശ്നങ്ങൾക്കും പരിഹാരം കാണുമെന്ന് അദ്ദേഹം ഉറപ്പുനൽകി.