ആർ എസ്സ് എസ്സ് സർസംഘ് ചാലക് മോഹൻ ഭാഗവത് അഞ്ചു ദിവസം യു പി യിൽ ക്യാമ്പ് ചെയ്യും; ഗോരഖ്‌പൂരിലെ കാര്യകർത്താ ക്യാമ്പിൽ പങ്കെടുക്കും; മുഖ്യമന്ത്രിയുമായി കൂടിക്കാഴ്ച നടത്താനും സാധ്യത!

ഗോരഖ്‌പൂർ: അഞ്ചു ദിവസത്തെ സംഘടനാ പരിപാടികൾക്കായി രാഷ്ട്രീയ സ്വയം സേവക് സംഘ് മേധാവി മോഹൻ ഭാഗവത് ഉത്തർപ്രദേശിലെത്തി. ബുധനാഴ്ചയോടെ സംസ്ഥാനത്ത് എത്തിയ അദ്ദേഹം അടുത്ത അഞ്ചു ദിവസം ഇവിടെ തങ്ങും. ഇന്നലെ അദ്ദേഹം ഗോരഖ്‌പൂരിലെ കാര്യകർത്താ വികാസ് വർഗ്ഗിൽ പങ്കെടുത്തു. അടുത്ത ദിവസങ്ങളിൽ അദ്ദേഹം മുഖ്യമന്ത്രി യോഗി ആദിത്യനാഥുമായി ചർച്ച നടത്തും. കാശി, ഗോരഖ്‌പൂർ, കാൺപൂർ, അവധ് തുടങ്ങിയ ജില്ലകളിൽ നിന്നുള്ള 280 ലധികം കാര്യകർത്താക്കളാണ് വർഗ്ഗിൽ പങ്കെടുക്കുന്നത്. സംഘശാഖകളുടെ എണ്ണം വർദ്ധിപ്പിക്കുന്നതിലും സംഘം ഏറ്റെടുത്തിരിക്കുന്ന വിവിധ പ്രോജക്ടുകൾ നടപ്പാക്കുന്നതിനെ കുറിച്ചുമുള്ള നിർദ്ദേശങ്ങൾ സർസംഘ് ചാലക് കാര്യകർത്താക്കൾക്ക് നൽകിയതായാണ് സൂചന. സംഘപ്രവർത്തകരുമായും പരിശീലകരുമായും പ്രത്യേകം പ്രത്യേകം യോഗങ്ങളിൽ അദ്ദേഹം സംവദിക്കും.

കഴിഞ്ഞ ലോക്‌സഭാ തെരഞ്ഞെടുപ്പിൽ ബിജെപിക്ക് ഏറ്റവും വലിയ തിരിച്ചടി നേരിട്ട സംസ്ഥാനമാണ് ഉത്തർപ്രദേശ്. തിരിച്ചടിക്ക് കാരണമായ ഘടകങ്ങൾ പാർട്ടി സംസ്ഥാന നേതൃത്വം പരിശോധിക്കുകയാണ്. കേന്ദ്ര മന്ത്രിമാരടക്കം തെരഞ്ഞെടുപ്പിൽ പരാജയമറിഞ്ഞിരുന്നു. ഈ സാഹചര്യത്തിലാണ് സർസംഘ് ചാലക് അഞ്ചു ദിവസം സംസ്ഥാനത്ത് തങ്ങുന്നതും മുഖ്യമന്ത്രിയുമായി കൂടിക്കാഴ്ച നടത്തുന്നതും.

തിങ്കളാഴ്ച നാഗപ്പൂരിലും സമാനമായ കാര്യകർത്ത വികാസ് വർഗ്ഗിൽ ആർ എസ്സ് എസ്സ് മേധാവി പങ്കെടുത്തിരുന്നു. നാഗ്പൂരിൽ പ്രവർത്തകരെ അഭിസംബോധന ചെയ്യുമ്പോഴാണ് മണിപ്പുർ വിഷയം മുൻഗണന നൽകി പരിഹരിക്കണമെന്ന നിർദ്ദേശം അദ്ദേഹം നൽകിയത്. ‘കഴിഞ്ഞ ഒരു വർഷമായി മണിപ്പുർ സമാധാനത്തിനായി കാത്തിരിക്കുകയാണ്. പത്തുവർഷം അവിടെ സമാധാനം പുലർന്നിരുന്നു. വർഷങ്ങളായി നിലനിന്നിരുന്ന സംഘർഷങ്ങൾ അവസാനിച്ചു എന്ന് എല്ലാവരും കരുതിയതാണ്. പെട്ടെന്നാണ് സംസ്ഥാനം സംഘർഷത്തിന്റെ പിടിയിലായത്. തെരഞ്ഞെടുപ്പ് അവസാനിച്ച സ്ഥിതിക്ക് മണിപ്പുർ വിഷയം മുൻഗണന നൽകി പരിഹരിക്കണം’ – അദ്ദേഹം പറഞ്ഞു