സംസ്കാരസമ്പന്നരും ദേശഭക്തരുമായ കുഞ്ഞുങ്ങളുടെ പിറവിക്കായി…! ‘ഗർഭസംസ്കാർ’ പരിപാടിയുമായിആർ.എസ്.എസ്

ദില്ലി: സംസ്കാരസമ്പന്നരും ദേശഭക്തരുമായ കുഞ്ഞുങ്ങളുടെ പിറവി ലക്ഷ്യമിട്ടുകൊണ്ട് ഗർഭിണികളെ ഭഗവദ്ഗീത, രാമായണം തുടങ്ങിയവ വായിക്കാനും സംസ്കൃതമന്ത്രങ്ങൾ ഉരുവിടാനും യോഗചെയ്യാനും പ്രോത്സാഹിപ്പിക്കുന്ന ‘ഗർഭസംസ്കാർ’ പരിപാടിയുമായി ആർ.എസ്.എസിന്റെ വനിതാസംഘടന ഞായറാഴ്ച തുടക്കം കുറിക്കും. ആർ.എസ്.എസിന്റെ വനിതാവിഭാഗമായ രാഷ്ട്രസേവികാസംഘിന്റെ ഘടകമായ സംവർധിനി ന്യാസിലെ ഡോക്ടർമാരാണ് രാജ്യത്തുടനീളം ഈ പരിപാടി സംഘടിപ്പിക്കുന്നത്.

ഭ്രൂണാവസ്ഥമുതൽ പ്രസവംവരെ ഗർഭപാത്രത്തിൽവെച്ച് ശിശുക്കൾ സംസ്കാരവും മൂല്യവും പഠിക്കുന്നുവെന്ന് ഉറപ്പുവരുത്തുന്നതിനായുള്ള സമഗ്രവും ശാസ്ത്രീയവുമായ പദ്ധതിയാണിതെന്ന് സംവർധിനി ന്യാസ് വക്താവ് അവകാശപ്പെട്ടു. ഗർഭകാലത്ത് ആരോഗ്യദായകമായ ഭക്ഷണം കഴിക്കുക, നല്ല ചുറ്റുപാടുകളിൽ ജീവിക്കുക തുടങ്ങിയ കാര്യങ്ങളിൽ ഗർഭിണികൾക്കും അവരുടെ കുടുംബങ്ങൾക്കും മാർഗനിർദേശം നൽകും. രാജ്യത്തെ അഞ്ചുമേഖലകളായി തിരിച്ച് ഓരോ മേഖലയിലും 10 ഡോക്ടർമാരുടെ സംഘം പരിപാടിക്ക് നേതൃത്വം നൽകും.

വെർച്വലായി നടക്കുന്ന ഉദ്ഘാടനച്ചടങ്ങിൽ തെലങ്കാന ഗവർണർ തമിഴിസൈ സൗന്ദർരാജൻ ഉൾപ്പെടെയുള്ളവർ പങ്കെടുക്കും. ‘ഗർഭസംസ്കാർ’ പരിപാടിയുടെ നടത്തിപ്പിനും മാർഗനിർദേശത്തിനുമായി സംവർധിനി ന്യാസ് എട്ടംഗ കേന്ദ്രസംഘം രൂപവത്കരിച്ചിട്ടുണ്ട്. ഇതിൽ അലോപ്പതി, ഹോമിയോപ്പതി, ആയുർവേദ ഡോക്ടർമാരും വിഷയവിദഗ്ധരും ഉൾപ്പെടുന്നു.

ജനിക്കുന്ന ഓരോ കുഞ്ഞും, അത് ആണോ പെണ്ണോ ആകട്ടെ നല്ല സംസ്കാരത്തോടെയും നല്ല ചിന്തകളോടെയും ദേശഭക്തരാകണമെന്നാണ് പദ്ധതിയുടെ പ്രധാന ലക്ഷ്യമെന്ന് ന്യാസ് വക്താക്കൾ അറിയിച്ചു. ‘‘ഭ്രൂണാവസ്ഥയിൽത്തന്നെ കുഞ്ഞുമായി ആശയവിനിമയം നടത്താൻ അച്ഛനമ്മമാരെ പ്രോത്സാഹിപ്പിക്കും. നാലുമാസം പ്രായമായാൽ ഗർഭസ്ഥശിശു പുറത്തെ ശബ്ദങ്ങളുംമറ്റും ശ്രദ്ധിച്ചുതുടങ്ങുമെന്ന് ശാസ്ത്രീയമായി തെളിയിക്കപ്പെട്ടതാണ്. വളരുന്നതിനനുസരിച്ച് കുഞ്ഞിനോട് അച്ഛനമ്മമാർ സംസാരിക്കാൻ ശ്രദ്ധിക്കണം. ഗർഭാവസ്ഥയിൽ യോഗാഭ്യാസം നടത്താനും പരിശീലിപ്പിക്കും. ഇത് സ്വാഭാവികപ്രസവത്തിന് സഹായിക്കും’’ എന്ന് ന്യാസ് വക്താവ് പറഞ്ഞു.