ഫ്രാന്‍സിനേയും ബ്രിട്ടനേയും മറികടക്കും: ഇന്ത്യ ലോകത്തെ ആറാമത്തെ വലിയ സാമ്പത്തിക ശക്തിയാകുമെന്ന് പഠനം

ദില്ലി: ഇന്ത്യ​ ലോകത്തെ ആറാമത്തെ വലിയ സാമ്പത്തിക ശക്തിയായി മാറുമെന്ന്​ പ്രവചനം. ഫ്രാന്‍സിനേയും ബ്രിട്ടനേയും മറികടന്നായിരിക്കും ഇന്ത്യ കുതിക്കുന്നത്. ബ്രിട്ടീഷ്​ കണ്‍സള്‍ട്ടന്‍സി സ്ഥാപനമായ സെബറാണ്​ പഠനം നടത്തിയത്​.

2022ല്‍ ഇന്ത്യ ഫ്രാന്‍സിനെ മറികടക്കുകയും, 2023-ല്‍ ബ്രിട്ടനേ മറികടന്ന്​ ലോകത്തെ ആറാമത്തെ വലിയ സാമ്പത്തിക ശക്തിയായി ഇന്ത്യ മാറുകയും ചെയ്യും. 2030-ല്‍ ചൈന യു.എസിനെ മറികടന്ന്​ ഒന്നാമത്തെ വലിയ സാമ്പത്തിക ശക്​തിയാകും.

അതേസമയം, നേരത്തെ പ്രവചിച്ചതിലും വൈകിയായിരിക്കും ചൈന ഒന്നാം സ്ഥാനത്തേക്ക്​ കുതിക്കുകയെന്നും സെബര്‍ വ്യക്തമാക്കുന്നു. 2033ഓടെ ജപ്പാന്‍ ജര്‍മ്മനിയെ മറികടക്കും. 2036ഓടെ റഷ്യന്‍ സമ്പദ്​വ്യവസ്ഥയിലും മുന്നേറ്റമുണ്ടാകും.

മാത്രമല്ല 2034-ല്‍ ഇന്തോനേഷ്യ ലോക സാമ്പത്തിക ശക്​തികളുടെ പട്ടികയില്‍ ഒമ്പതാം സ്ഥാനത്തേക്ക്​ കുതിക്കുമെന്നും പ്രവചനമുണ്ട്​. പണപ്പെരുപ്പമാണ്​ നിലവില്‍ ലോക​രാജ്യങ്ങള്‍ നേരിടുന്ന പ്രധാനവെല്ലുവിളി. എന്നാൽ അതിനെ കൃത്യമായി നേരിട്ടില്ലെങ്കില്‍ സാമ്പത്തികമാന്ദ്യം പല സമ്പദ്​വ്യവസ്ഥകളേയും കാത്തിരിക്കുന്നുണ്ടെന്നും സെബര്‍ മുന്നറിയിപ്പ്​ നല്‍കുന്നു.