ഒരു മാസത്തിനിടെ രണ്ടാം തവണ! ചെങ്ങന്നൂർ വനിതാ ഐടിഐയിൽ വിദ്യാർഥിനികൾക്ക് ഭക്ഷ്യവിഷബാധ; അധികൃതർക്കെതിരെ വൻ പ്രതിഷേധം

ചെങ്ങന്നൂർ: ചെങ്ങന്നൂർ ഗവൺമെന്റ് വനിതാ ഐടിഐയിൽ വിദ്യാർഥിനികൾക്ക് വീണ്ടും ഭക്ഷ്യവിഷബാധയേറ്റതായി സംശയം. ശാരീരിക അസ്വസ്ഥതകളെ തുടർന്ന് ഇൻസ്റ്റിറ്റ്യൂട്ടിലെ സർവേയർ വിഭാഗത്തിലെ അഞ്ച് വിദ്യാർഥിനികളെ ആശുപത്രിയിൽ പ്രവേശിപ്പിച്ചു. വ്യാഴാഴ്ച സ്ഥാപനത്തിൽ നിന്നും വിതരണം ചെയ്ത ഉച്ചഭക്ഷണം കഴിച്ചതിന് ശേഷമാണ് കുട്ടികൾക്ക് അസ്വസ്ഥതകൾ ആരംഭിച്ചത്. ഭക്ഷണത്തിനൊപ്പം വിളമ്പിയ അച്ചാറിന് കടുത്ത അരുചി അനുഭവപ്പെട്ടിരുന്നതായി ചികിത്സയിൽ കഴിയുന്ന വിദ്യാർഥിനികൾ വ്യക്തമാക്കി.

നൂറ്റമ്പതോളം വിദ്യാർഥിനികൾ പഠിക്കുന്ന ചെങ്ങന്നൂർ വനിതാ ഐടിഐയിൽ പുറത്തുനിന്നുള്ള ഒരു ഏജൻസിയാണ് ദിവസേന ഉച്ചഭക്ഷണം എത്തിച്ചു നൽകുന്നത്. എന്നാൽ, ഈ ഏജൻസി നൽകുന്ന ഭക്ഷണത്തിന്റെ ഗുണനിലവാരത്തെച്ചൊല്ലി മുൻപും ഇവിടെ വ്യാപകമായ പരാതികൾ ഉയർന്നിരുന്നു. വ്യാഴാഴ്ച ഉച്ചയ്ക്ക് രണ്ട് മണിയോടെയാണ് വിദ്യാർഥിനികൾക്ക് ശാരീരികാസ്വസ്ഥതകൾ അനുഭവപ്പെട്ടത്. തുടർന്ന് കുട്ടികൾ സ്വന്തം നിലയ്ക്കാണ് ആശുപത്രിയിൽ ചികിത്സ തേടിയത്.

സംഭവത്തിൽ ഐടിഐ അധികൃതരുടെ ഭാഗത്തുനിന്ന് ഗുരുതരമായ വീഴ്ചയുണ്ടായതായി പിടിഎ ഭാരവാഹികളും രക്ഷിതാക്കളും ആരോപിച്ചു. ഉച്ചയ്ക്ക് രണ്ട് മണിക്ക് കുട്ടികൾക്ക് അസ്വസ്ഥത ഉണ്ടായിട്ടും, വൈകുന്നേരം അഞ്ച് മണിയോടെ മാത്രമാണ് അധികൃതർ രക്ഷിതാക്കളെ വിവരം അറിയിക്കാൻ തയ്യാറായതെന്നാണ് ആക്ഷേപം. അപകടകരമായ ഇത്തരം സാഹചര്യങ്ങളിൽ കൃത്യസമയത്ത് നടപടിയെടുക്കാൻ കോളേജ് അധികൃതർ വിമുഖത കാണിച്ചതായും രക്ഷിതാക്കൾ പറയുന്നു.

ഏകദേശം ഒരു മാസം മുൻപും സമാനമായ രീതിയിൽ ഈ ഐടിഐയിൽ വിദ്യാർഥിനികൾക്ക് ഭക്ഷണം കഴിച്ച് അസ്വസ്ഥതകൾ ഉണ്ടായിരുന്നു. തുടർച്ചയായി പരാതികൾ ഉയർന്നിട്ടും പുറത്തുനിന്ന് എത്തിക്കുന്ന ഭക്ഷണത്തിന്റെ ഗുണനിലവാരം കൃത്യമായി പരിശോധിക്കാൻ ഇൻസ്റ്റിറ്റ്യൂട്ട് അധികൃതർ തയ്യാറാകാതിരുന്നതാണ് വീണ്ടും ഭക്ഷ്യവിഷബാധ ആവർത്തിക്കാൻ കാരണമായതെന്ന് വിദ്യാർഥികൾ ആരോപിക്കുന്നു. സംഭവത്തെ തുടർന്ന് ആരോഗ്യ വകുപ്പും പൊലീസും സ്ഥലത്തെത്തി അന്വേഷണം ആരംഭിച്ചിട്ടുണ്ട്.