വ്യാജ ഒപ്പ് കേസ്! കൊൽക്കത്ത ഹൈക്കോടതി ഉത്തരവിന് പിന്നാലെ അഭിഷേക് ബാനർജി സിഐഡി ആസ്ഥാനത്ത് ഹാജരായി

കൊൽക്കത്ത : തൃണമൂൽ കോൺഗ്രസ് ദേശീയ ജനറൽ സെക്രട്ടറി അഭിഷേക് ബാനർജി കൊൽക്കത്തയിലെ സംസ്ഥാന ക്രിമിനൽ ഇൻവെസ്റ്റിഗേഷൻ ഡിപ്പാർട്ട്മെന്റ് (സിഐഡി) ആസ്ഥാനത്ത് ചോദ്യം ചെയ്യലിനായി ഹാജരായി. കൊൽക്കത്ത അലിപ്പോരിലെ ഭവാനി ഭവനിൽ ഇന്ന് ഉച്ചകഴിഞ്ഞാണ് അഭിഷേക് എത്തിയത്. നിയമസഭയിലെ വ്യാജ ഒപ്പ് വിവാദവുമായി ബന്ധപ്പെട്ട കേസിൽ വൈകുന്നേരം ആറ് മണിക്ക് മുൻപായി അന്വേഷണ ഉദ്യോഗസ്ഥർക്ക് മുന്നിൽ ഹാജരാകണമെന്ന് കൊൽക്കത്ത ഹൈക്കോടതി കർശന നിർദ്ദേശം നൽകിയിരുന്നു.

നേരത്തെ, കേസിൽ ഡയമണ്ട് ഹാർബർ എം.പി കൂടിയായ അഭിഷേക് ബാനർജിക്ക് ഹൈക്കോടതിയുടെ സിംഗിൾ ബെഞ്ച് മൂന്ന് ആഴ്ചത്തേക്ക് താൽക്കാലിക അറസ്റ്റ് വിലക്ക് അനുവദിച്ച് ആശ്വാസം നൽകിയിരുന്നു. ജസ്റ്റിസ് കൗശിക് ചന്ദ അദ്ധ്യക്ഷനായ ബെഞ്ചാണ് ഇടക്കാല ആശ്വാസം നൽകിയത്. എന്നാൽ, അന്വേഷണവുമായി പൂർണ്ണമായി സഹകരിക്കണമെന്ന കർശന വ്യവസ്ഥയിലാണ് ഈ ആനുകൂല്യം കോടതി നൽകിയത്. ഇതിന്റെ ആദ്യപടിയായാണ് ഇന്ന് വൈകിട്ട് ആറ് മണിക്ക് മുൻപ് ഹാജരാകാൻ കോടതി ആവശ്യപ്പെട്ടത്. ദില്ലിയിൽ നിന്നും വൈകിട്ട് നാല് മണിയോടെ കൊൽക്കത്തയിൽ വിമാനമിറങ്ങിയ അഭിഷേക് ബാനർജി നേരെ ഭവാനി ഭവനിലേക്ക് തിരിക്കുകയായിരുന്നു.

രണ്ട് ഭരണകക്ഷി എംഎൽഎമാർ നിയമസഭാ സെക്രട്ടേറിയറ്റിന് നൽകിയ പരാതിയെ തുടർന്നാണ് ആഭ്യന്തര വകുപ്പ് കേസ് അന്വേഷണം സിഐഡിക്ക് കൈമാറിയത്. മുതിർന്ന ടിഎംസി നേതാവ് ശോഭൻദേവ് ചട്ടോപാധ്യായയെ നിയമസഭയിലെ പ്രതിപക്ഷ നേതാവായി ശുപാർശ ചെയ്തുകൊണ്ട് സ്പീക്കർക്ക് നൽകിയ ഔദ്യോഗിക പ്രമേയത്തിൽ തങ്ങളുടെ ഒപ്പുകൾ വ്യാജമായി രേഖപ്പെടുത്തി എന്നായിരുന്നു എംഎൽഎമാരുടെ പരാതി. ഈ യോഗത്തിൽ തങ്ങൾ പങ്കെടുക്കുകയോ ഒപ്പിടാൻ ആരെയും ചുമതലപ്പെടുത്തുകയോ ചെയ്തിട്ടില്ലെന്നും ഇവർ അവകാശപ്പെട്ടു. പശ്ചിമ ബംഗാൾ നിയമസഭാ തിരഞ്ഞെടുപ്പിൽ തൃണമൂൽ കോൺഗ്രസ് കനത്ത പരാജയം ഏറ്റുവാങ്ങിയതിന് തൊട്ടുപിന്നാലെയാണ് പാർട്ടിയിലെ ആഭ്യന്തര ഭിന്നതകൾ രൂക്ഷമാക്കിക്കൊണ്ട് ഈ വിവാദം ഉയർന്നുവന്നത്.

ഹൈക്കോടതിയിൽ നടന്ന വാദത്തിനിടെ, സംസ്ഥാന സർക്കാരിന് വേണ്ടി ഹാജരായ അഡീഷണൽ അഡ്വക്കേറ്റ് ജനറൽ രാജ്ദീപ് മജുംദാർ അഭിഷേക് ബാനർജിക്ക് ഇടക്കാല ആശ്വാസം നൽകുന്നതിനെ ശക്തമായി എതിർത്തു. കേസിന്റെ സമയക്രമങ്ങളിൽ വലിയ അപാകതകളുണ്ടെന്നും അതിനാൽ പ്രതിയെ കസ്റ്റഡിയിൽ ചോദ്യം ചെയ്യേണ്ടതുണ്ടെന്നും അദ്ദേഹം വാദിച്ചു. മെയ് 6-നാണ് പ്രമേയത്തിൽ എംഎൽഎമാർ ഒപ്പിട്ടതെന്ന് രേഖകളിൽ വ്യക്തമാക്കുമ്പോൾ, അഭിഷേക് ബാനർജി മെയ് 9-നാണ് സ്പീക്കർക്ക് കത്ത് നൽകിയത്. എന്നാൽ പിന്നീട് നിയമസഭാ സെക്രട്ടേറിയറ്റ് മിനിറ്റ്സ് ആവശ്യപ്പെട്ടപ്പോൾ മെയ് 19-നാണ് ഒപ്പുകൾ ശേഖരിച്ചതെന്നാണ് ടിഎംസി നേതൃത്വം വിശദീകരിച്ചത്. ഈ സാഹചര്യത്തിൽ അഭിഷേകിന്റെ പങ്ക് വെറുമൊരു സാക്ഷിയെന്ന നിലയിൽ നിന്ന് പ്രധാന പങ്കാളി എന്ന നിലയിലേക്ക് മാറിയിട്ടുണ്ടോ എന്ന് പരിശോധിക്കേണ്ടതുണ്ടെന്നും ഒറിജിനൽ രേഖകൾ അദ്ദേഹത്തിന്റെ കൈവശമില്ലെന്നും പ്രോസിക്യൂഷൻ കോടതിയെ അറിയിച്ചു.

എന്നാൽ, നടപടിക്രമങ്ങളിലെ അപാകതകളോ തീയതികളിൽ വന്ന മാറ്റങ്ങളോ ഒരിക്കലും ഒരു ക്രിമിനൽ കുറ്റമായി കാണാൻ കഴിയില്ലെന്ന് അഭിഷേക് ബാനർജിക്ക് വേണ്ടി ഹാജരായ മുതിർന്ന അഭിഭാഷകൻ അയാൻ ഭട്ടാചാര്യ വാദിച്ചു. പ്രമേയം അന്തിമമാക്കിയ യോഗത്തിൽ അഭിഷേക് പങ്കെടുത്തിരുന്നില്ലെന്നും പാർട്ടിയുടെ ജനറൽ സെക്രട്ടറി എന്ന നിലയിൽ ആ രേഖ സ്പീക്കർക്ക് കൈമാറുക മാത്രമാണ് അദ്ദേഹം ചെയ്തതെന്നും പ്രതിഭാഗം വ്യക്തമാക്കി. പാർട്ടി അധ്യക്ഷ മമത ബാനർജിയുടെ കാളിഘട്ടിലെ വസതിയുടെ പരിസരത്തുള്ള പാർട്ടി ഓഫീസിൽ സിഐഡി അടുത്തിടെ നടത്തിയ റെയ്ഡിന് പിന്നാലെയാണ് കോടതിയുടെ ഈ ഇടപെടൽ ഉണ്ടായിരിക്കുന്നത്. കേസിന്റെ അന്വേഷണ പുരോഗതി റിപ്പോർട്ട് രണ്ട് ആഴ്ചയ്ക്കകം സമർപ്പിക്കാൻ സി.ഐ.ഡിക്ക് നിർദ്ദേശം നൽകിയ കോടതി, കേസ് 14 ദിവസത്തിന് ശേഷം വീണ്ടും പരിഗണിക്കാൻ മാറ്റിവെച്ചു.