“കെ റെയിൽ കൊണ്ടെത്തിക്കുക വൻ നാശത്തിൽ, പിണറായിയുടെ കണ്ണ് കമ്മീഷനിൽ മാത്രം”: സിആർ പരമേശ്വരൻ

തിരുവനന്തപുരം: സംസ്ഥാനത്ത് കെ-റെയില്‍ (K Rail) പദ്ധതിക്കെതിരെ വിമർശനങ്ങൾ ശക്തമായിക്കൊണ്ടിരിക്കുകയാണ്. ജനങ്ങളോട് ഒരു ബാധ്യതയുമില്ലാതെയാണ് മുഖ്യമന്ത്രി സില്‍വര്‍ ലൈന്‍ പദ്ധതിയുമായി മുന്നോട്ടുപോകുന്നത്. പ്രതിപക്ഷം ഉൾപ്പെടെ സാമൂഹിക-സാംസ്കാരിക പ്രവർത്തകർ പോലും ഈ പദ്ധതിയ്‌ക്കെതിരാണ്. ഇപ്പോഴിതാ വിഷയത്തിൽ രൂക്ഷവിമർശനവുമായി എത്തിയിരിക്കുകയാണ് ഐ.ടി വിഭാഗം മുൻ ഡെപ്യൂട്ടി കമ്മീഷണർ സിആർ പരമേശ്വരൻ (CR Parameswaran). അദ്ദേഹം തന്റെ ഫേസ്ബുക്കിലാണ് ഇതുസംബന്ധിച്ച വിമർശനം ഉന്നയിച്ചത്. കെ റെയിൽ കൊണ്ടെത്തിക്കുക വൻ നാശത്തിലാണെന്നും, സാമ്പത്തികമായും പാരിസ്ഥിതികമായും കേരളത്തിന്റെ നടുവൊടിക്കുന്ന, ഒരു മാഫിയ സംഘത്തിന് ലഭിക്കുന്ന കമ്മീഷനെ മാത്രം ആസ്പദമാക്കിയുള്ള ,പദ്ധതി മാത്രമാണിതെന്നും അദ്ദേഹം തന്റെ ഫേസ്ബുക്ക് കുറിപ്പിൽ പറയുന്നു.

അദ്ദേഹത്തിന്റെ ഫേസ്ബുക്ക് കുറിപ്പിന്റെ പൂർണ്ണരൂപം:

സാമ്പത്തികമായും പാരിസ്ഥിതികമായും കേരളത്തിന്റെ നടുവൊടിക്കുന്ന, ഒരു മാഫിയ സംഘത്തിന് ലഭിക്കുന്ന കമ്മീഷനെ മാത്രം ആസ്പദമാക്കിയുള്ള ,പദ്ധതിയെ കുറിച്ചുള്ള കാപട്യവചനങ്ങൾ ഉച്ചരിക്കാൻ തന്നെ ഒരു അധികാരിക്ക് ധൈര്യം വരുന്നത് ഈ സമൂഹത്തിലെ vocal ആയ ആളുകളുടെ -എഴുത്തുകാർ ,മാധ്യമങ്ങൾ ,മധ്യവർഗ്ഗികൾ – കഠിനമായ മൂല്യത്തകർച്ചയെ കുറിച്ച് അയാൾക്ക് ഉറപ്പുള്ളത് കൊണ്ടാണ്.

സൈലന്റ് വാലി പദ്ധതിക്കാലത്തെ സുമനസ്സുകളായ എഴുത്തുകാരുടെ ശക്തമായ പ്രതിഷേധവും കാലാകാലങ്ങളായി കമ്മികൾ നൽകിപ്പോരുന്ന ഇര വിഴുങ്ങിയിട്ടുള്ളതിനാൽ വരാനിരിക്കുന്ന മഹാനാശത്തെ കുറിച്ച് ‘അറിയുകയേയില്ല’എന്ന മട്ടിൽ ചുരുണ്ടു കൂടിയിരിക്കുന്ന ഇപ്പോഴത്തെ എഴുത്തുകാരുടെ നിശ്ശബ്ദതയും തമ്മിൽ താരതമ്യം ചെയ്യുക .ഓനൊക്കെ കൗപീനാന്തരകവിതാചർച്ചയിലാണ്.

സ്റ്റോക്ക്ഹോം ഉച്ചകോടിയിൽ നിന്ന് പാരിസ്ഥിതിക വിദ്യാഭ്യാസം ലഭിച്ച ഇന്ദിരാഗാന്ധി ആണ് നിർണ്ണായകമായി ഇന്നത്തെ ആർത്തിക്കാരുടെ മുൻതലമുറക്കാരുടെ ആ പദ്ധതിമോഹത്തെ ഉച്ചാടനം ചെയ്തത് . എന്നാൽ ഇന്ന് കേരളത്തിലെ നേതാക്കളുടെ അതേ പാരിസ്ഥിതിക നിരക്ഷരതയുള്ളവരാണ് കേന്ദ്രത്തിൽ . അല്ലായിരുന്നെങ്കിൽ ,ഇത്രക്ക് ബാലിശമായ പദ്ധതി പ്രാഥമികാനുമതി നൽകാതെ തന്നെ ചവറ്റുകുട്ടയിൽ തള്ളുമായിരുന്നു.