ഡോക്ടറുടെയും നഴ്‌സിൻ്റെയും വേഷത്തിലെത്തി തട്ടിക്കൊണ്ട് പോയ നവജാത ശിശുവിനെ കണ്ടെത്തി ! 3 യുവതികൾ അറസ്റ്റിൽ; പിടിയിലായവർ മനുഷ്യ കടത്ത് മാഫിയയുടെ കണ്ണികളെന്ന് സംശയം

ബെംഗളൂരു : കർണാടകയിലെ കലബുറഗിയിൽ ഡോക്ടറുടെയും നഴ്‌സിൻ്റെയും വേഷത്തിൽ എത്തി തട്ടിക്കൊണ്ട് പോയ നവജാത ശിശുവിനെ കണ്ടെത്തി. തട്ടിക്കൊണ്ട് പോകൽ നടന്ന് 24 മണിക്കൂറിനുള്ളിലാണ് പോലീസ് കുഞ്ഞിനെ കണ്ടെത്തിയത്. കലബുറഗിയിലെ ജില്ലാ സർക്കാരാശുപത്രിയിൽ കഴിഞ്ഞ ദിവസമായിരുന്നു സംഭവം. മുഖത്ത് മാസ്‌ക് ധരിച്ചെത്തിയ രണ്ട് യുവതികളാണ് കുഞ്ഞിനെ എടുത്ത് കൊണ്ട് പോയത്. ആശുപത്രിയിലെയും പുറത്തുള്ള ചില കടകളിലെയും സിസിടിവി ദൃശ്യങ്ങളാണ് കുഞ്ഞിനെ കണ്ടെത്താൻ നിർണായകമായത്.

കുഞ്ഞിന് ചില ടെസ്റ്റുകൾ നടത്താനുണ്ട് എന്ന് പറഞ്ഞാണ് പ്രതികളായ യുവതികൾ കുഞ്ഞിനെ അമ്മയുടെ കൈകളിൽ നിന്ന് എടുത്ത് കൊണ്ട് പോയത്. ഏറെ സമയം കഴിഞ്ഞിട്ടും കുഞ്ഞിനെ തിരികെ എത്തിക്കാതെ വന്നതോടെബന്ധുക്കളും ആശുപത്രി അധികൃതരും വിവരം പോലീസിനെ അറിയിക്കുകയായിരുന്നു.തട്ടിക്കൊണ്ടുപോയ സംഘത്തിൽ പെട്ട മൂന്നു സ്ത്രീകളെ പോലീസ് പിടികൂടി. കുഞ്ഞിനെ തട്ടിക്കൊണ്ട് പോകാൻ പുറത്ത് നിന്ന് സഹായം നൽകിയ സ്ത്രീയെ അടക്കമാണ് പോലീസ് അറസ്റ്റ് ചെയ്തത്. പിടിയിലായവർ മനുഷ്യ കടത്ത് മാഫിയയുടെ ഭാഗമെന്നാണ് സംശയം.