മാസപ്പടി മുതൽ പി.പി ദിവ്യ വരെ.. ഇരുന്നൂറ് പേജിന്റെ വരയിട്ട ബുക്കിൽ എഴുതിയാൽ തീരാത്തത്രയും വിവാദങ്ങൾ തീർത്ത പിണറായി സർക്കാരിനേറ്റ കനത്ത തിരിച്ചടി; എം സ്വരാജിനുമപ്പുറം നിലമ്പൂരിൽ തകർന്നടിഞ്ഞത് മുഖ്യമന്ത്രിയും വീണുടഞ്ഞത് തുടര്‍ഭരണ മോഹങ്ങളും

ഏറെ അവകാശവാദങ്ങളുയർത്തിയിട്ടും നിലമ്പൂരിലുണ്ടായ വന്‍ തോല്‍വി എം സ്വരാജിനുമപ്പുറം സിപിഎമ്മിനും മുഖ്യമന്ത്രി പിണറായി വിജയനും കനത്ത തിരിച്ചടിയാവുകയാണ്. തുടര്‍ഭരണം മോഹിച്ച് നീക്കങ്ങൾ നടത്തിയ എല്‍ഡിഎഫ് നിലമ്പൂരിൽ ക്ളീൻ ബൗൾഡ് ആവുകയായിരുന്നു.

മാസപ്പടി ആരോപണം, പൂരം കലക്കല്‍, ക്ഷേമ പെന്‍ഷന്‍ മുടങ്ങല്‍, പി.പി ദിവ്യ, നവകേരള യാത്രയും രക്ഷാപ്രവര്‍ത്തനവും നവകേരളാ ബസ് അങ്ങനെ ഒരു ഇരുന്നൂറ് പേജിന്റെ വരയിട്ട ബുക്കിൽ എഴുതിയാൽ തീരാത്ത അത്രയും വിവാദങ്ങൾ ഉയർന്നു വന്ന രണ്ടാം പിണറായി സർക്കാരിന്റെ വിലയിരുത്തൽ കൂടിയായി നിലമ്പൂരിലെ ജനവിധി. ഒരു ഘട്ടത്തിൽ യുഡിഎഫിന് പാരയാകുമെന്ന് കണക്കുകൂട്ടി അതില്‍ ജയിച്ചുകയറാമെന്ന സിപിഎം കണക്കൂകൂട്ടലും പാളി. ആ ധൈര്യമാണ് സ്വരാജിന്റെ സ്ഥാനാര്‍ഥിത്വത്തിലേക്ക് പോലും പാര്‍ട്ടിയെ നയിച്ചത്. ഒമ്പത് ശതമാനത്തിന്റെ കുറവാണ് എൽഡിഎഫ് വോട്ട് വിഹിതത്തിലുണ്ടായത്.

എം.സ്വരാജിനെ 11005 വോട്ടിനാണ് ഷൗക്കത്ത് പരാജയപ്പെടുത്തിയത്. സ്വരാജിന്റെ തുടർച്ചയായ രണ്ടാമത്തെ പരാജയമായി ഇത്. കഴിഞ്ഞ നിയമസഭാ തിരഞ്ഞെടുപ്പിൽ തൃപ്പൂണിത്തുറ മണ്ഡലത്തിൽ കോൺഗ്രസിന്റെ കെ.ബാബുവിനോടും സ്വരാജ് പരാജയപ്പെട്ടിരുന്നു. മൂന്ന് മുന്നണികൾക്കുമെതിരേ സ്വതന്ത്രനായി മത്സരിച്ച മുൻ എം.എൽ.എ പതിനയ്യായിരത്തോളം വോട്ട് പിടിച്ച് കരുത്തുകാട്ടി. ക്രിസ്ത്യൻ സ്ഥാനാർഥിയിലൂടെ പരീക്ഷണം നടത്തിയ ബി.ജെ.പി. നാലാം സ്ഥാനത്തായി.