പുള്ളിപ്പുലി കുറുകെ ചാടി വിദ്യാർത്ഥിനിക്ക് പരിക്കേറ്റ സംഭവം;പരാതി വ്യാജമെന്ന് വനം വകുപ്പ്:വിദ്യാർത്ഥിനിയ്‌ക്കെതിരെ വനംവകുപ്പ് കേസ് എടുത്തു

ചെന്നൈ: തമിഴ്‌നാട്ടിൽ ഇരുചക്ര വാഹനത്തിന് കുറുകെ പുള്ളിപ്പുലി ചാടി പരിക്കേറ്റ വിദ്യാർത്ഥിനിയ്‌ക്കെതിരെ വനം വകുപ്പ് കേസെടുത്തു. ഗൂഡല്ലൂർ കമ്മാത്തി സ്വദേശിനിയായ സുശീലയ്‌ക്കെതിരെയാണ് കേസെടുത്തിരിക്കുന്നത്. സംഭവത്തിന് പിന്നാലെ പുള്ളിപ്പുലിയെ കണ്ടെത്താൻ വനംവകുപ്പിന് കഴിഞ്ഞിരുന്നില്ല. ഈ സാഹചര്യത്തിൽ പെൺകുട്ടി വ്യാജ പ്രചാരണം നടത്തുകയാണെന്ന് ആരോപിച്ചാണ് വനംവകുപ്പിന്റെ നടപടി.

കഴിഞ്ഞ മാസം 30 നായിരുന്നു വീട്ടിലേക്ക് ഇരുചക്രവാഹനത്തിൽ വരികയായിരുന്ന സുശീലയുടെ മുൻപിലേക്ക് പുള്ളിപ്പുലി ചാടി വീണത്. ഇതോടെ ഇരുചക്രവാഹനത്തിന്റെ നിയന്ത്രണം വിട്ട് പെൺകുട്ടിയ്‌ക്ക് നിലത്തു വീഴുകയുമായിരുന്നു. പെൺകുട്ടിയ്‌ക്ക് നെറ്റിയിലും കൈക്കും കാലിനുമെല്ലാം പരിക്കേറ്റു. തുടർന്ന് കോയമ്പത്തൂർ മെഡിക്കൽ കോളേജ് ആശുപത്രിയിൽ സുശീല ചികിത്സ തേടി.

സംഭവത്തിന് പിന്നാലെ പുള്ളിപ്പുലിയെ നിരീക്ഷിക്കാനായി വനംവകുപ്പ് ക്യാമറകൾ സ്ഥാപിച്ചിരുന്നു. എന്നാൽ പുള്ളിപ്പുലിയെ കണ്ടെത്താൻ കഴിഞ്ഞില്ല. ഇതോടെയാണ് സുശീലയുടേത് വ്യാജ ആരോപണമാണെന്ന് ചൂണ്ടിക്കാട്ടി വനംവകുപ്പ് രംഗത്ത് എത്തിയത്. ഇതേ തുടർന്ന് പോലീസിൽ പരാതിയും നൽകിയിരുന്നു. ഇതിന്റെ അടിസ്ഥാനത്തിലാണ് സുശീലയ്‌ക്കെതിരെ കേസ് എടുത്തത്. ഗൂഡല്ലൂർ ഗവ. ആർട്‌സ് ആന്റ് സയൻസ് കോളേജിലെ ബിബിഎസ് വിദ്യാർത്ഥിയാണ് സുശീല.