കനക കിരീടം ഉയർത്തിയവരുടെ കൈകളിൽ ഇനി ഗോൾഡൻ ഐഫോണും!!ഞെട്ടിച്ച് ലയണൽ മെസ്സി

പാരിസ് : പടിയിറങ്ങുന്നതിനു മുൻപായി അർജന്റീനയുടെ ജേഴ്സിയിൽ വിശ്വകിരീടം ഉയർത്തുന്നതിന് കൂടെ നിന്ന എല്ലാ താരങ്ങൾക്കും സപ്പോർട്ടിങ് സ്റ്റാഫിനും അർജന്റീന നായകൻ മെസ്സിയുടെ സ്നേഹ സമ്മാനം. 1.73 കോടി ചിലവിൽ ഗോൾഡൻ ഐഫോണുകളാണ് സഹതാരങ്ങൾക്കായി മെസി പ്രത്യേകം ഓർഡർ ചെയ്തിരിക്കുന്നത്. ഓർഡർ ചെയ്ത 36 ഗോൾഡൻ ഐഫോണുകളും മെസ്സിയുടെ പാരീസിലെ താമസസ്ഥലത്ത് എത്തിയിട്ടുണ്ട് . ഓരോ ഐഫോണിലും കളിക്കാരുടെ പേരും അവരുടെ ജഴ്സി നമ്പറും അർജന്റീനയുടെ ലോഗോയും പതിച്ചിട്ടുണ്ട്.

ഐഡിസൈൻ ഗോൾഡ് എന്ന സ്ഥാപനമാണു സ്വർണത്തിൽ പൊതിഞ്ഞ ഐഫോണുകൾ നിർമിച്ചത്. ലോകകപ്പ് നേടിയ ടീമങ്ങൾക്ക് എന്നും ഓർത്തിരിക്കുന്ന തരത്തിൽ പ്രത്യേകതയുള്ള സമ്മാനം നൽകണം എന്നാണ് മെസി ആഗ്രഹിച്ചതെന്ന് സ്ഥാപന മേധാവി വെളിപ്പെടുത്തി.

മെസി സഹതാരങ്ങൾക്കായി ഒരുക്കിയിരിക്കുന്ന സ്നേഹസമ്മാനത്തിന്റെ ചിത്രങ്ങൾ സമൂഹ മാദ്ധ്യമങ്ങളിലും വൈറലായി. ഖത്തർ ലോകകപ്പിൽ ഫ്രാൻസിനെ പെനാൽറ്റി ഷൂട്ടൗട്ടിൽ 4-2ന് വീഴ്ത്തിയാണ് മെസിയും കൂട്ടരും 36 വർഷങ്ങൾക്കുശേഷം കനക കിരീടം അർജന്റീനയുടെ മണ്ണിലെത്തിച്ചത്.