“നിയമസഭ പാസാക്കിയ ബില്ലുകളിൽ വ്യക്തത കിട്ടേണ്ടതുണ്ട് ! മന്ത്രിമാർക്കും ചോദ്യങ്ങൾക്ക് മറുപടി പറയാൻ സാധിക്കുന്നില്ല !” സർക്കാരിനെതിരെ തുറന്നടിച്ച് ഗവർണർ ആരിഫ് മുഹമ്മദ് ഖാൻ

തിരുവന്തപുരം: ബില്ലുകൾ അനിശ്ചിതകാലത്തേക്ക്‌ തടഞ്ഞുവെക്കാൻ ഗവർണർക്ക് അധികാരമുണ്ടോയെന്ന വിഷയത്തിൽ മുതിർന്ന അഭിഭാഷകൻ ഫാലി എസ്. നരിമാനോട് സർക്കാർ നിയമോപദേശം തേടിയതിന് പിന്നാലെ നിയമസഭ പാസാക്കിയ ബില്ലുകളിൽ ഇനിയും വ്യക്തത കിട്ടേണ്ടതുണ്ടെന്ന് ഗവർണർ ആരിഫ് മുഹമ്മദ് ഖാൻ വ്യക്തമാക്കി. മന്ത്രിമാർക്ക് തന്റെ ചോദ്യങ്ങൾക്കുള്ള മറുപടി പറയാൻ സാധിക്കുന്നില്ലെന്നും ഗവർണർ പറഞ്ഞു. തിരുവനന്തപുരത്ത് മാദ്ധ്യമങ്ങളോട് സംസാരിക്കവെയായിരുന്നു അദ്ദേഹത്തിന്റെ പ്രതികരണം.

‘ചാൻസലർ സ്ഥാനത്ത് തുടരാൻ തന്നോട് ആവശ്യപ്പെട്ടത് മുഖ്യമന്ത്രിയാണ്. എന്തുകൊണ്ട് അദ്ദേഹം ആ കത്ത് പിൻവലിച്ചില്ല. ബില്ലുകളിൽ ഇനിയും വ്യക്തത കിട്ടേണ്ടതുണ്ട്. മുഖ്യമന്ത്രി അയക്കുന്ന മന്ത്രിമാർക്കും തന്റെ ചോദ്യങ്ങൾക്ക് മറുപടി പറയാൻ സാധിക്കുന്നില്ല. പിന്നെ ആരോടാണ് ചോദ്യങ്ങൾ ചോദിക്കേണ്ടത്’, തിരുവനന്തപുരത്ത് മാധ്യമങ്ങളോട് സംസാരിക്കവെ ഗവർണർ ചോദിച്ചു.

ലോകായുക്തയുടെ അധികാരം വെട്ടിച്ചുരുക്കുന്ന ബിൽ, സർവകലാശാലാ ചാൻസലർ സ്ഥാനത്തുനിന്ന് ഗവർണറെ മാറ്റുന്ന ബിൽ തുടങ്ങിയ ബില്ലുകളിലാണ് ഗവർണർ തീരുമാനമെടുക്കാത്തത്.