ഔദ്യോഗിക തിരക്കിനിടയിലും മാതൃകയായി ഗവർണർ രാജേന്ദ്ര ആർലേക്കർ! റോഡിൽ കുഴഞ്ഞുവീണ വഴിയാത്രക്കാരന് തുണയായി, ഗവർണർ മടങ്ങിയത് യുവാവിനെ ആശുപത്രിയിലേക്ക് മാറ്റി വിദഗ്ധ പരിശോധന ഉറപ്പാക്കണമെന്ന് കർശന നിർദ്ദേശം നൽകിയ ശേഷം

തിരുവനന്തപുരം നഗരത്തിലെ ഓണാഘോഷത്തിനിടയിൽ ലോക്ഭവൻ ഗേറ്റിന് സമീപം അപ്രതീക്ഷിതമായി ദേഹാസ്വാസ്ഥ്യം അനുഭവപ്പെട്ട് റോഡിൽ വീണ വഴിയാത്രക്കാരന് തുണയായി കേരള ഗവർണർ രാജേന്ദ്ര വിശ്വനാഥ് ആർലേക്കർ. ഓണാഘോഷങ്ങളിൽ പങ്കെടുക്കാനായി ഔദ്യോഗിക വാഹനത്തിൽ പുറത്തേക്ക് പോകുന്നതിനിടയിലാണ് ഗിരീഷ് എന്ന വഴിയാത്രക്കാരൻ പ്രമേഹം കൂടിയതിനെ തുടർന്ന് പെട്ടെന്ന് തലകറങ്ങി റോഡിലേക്ക് വീണത്. ഇത് ശ്രദ്ധയിൽപ്പെട്ട ഉടൻ തന്നെ ഒരു നിമിഷം പോലും പാഴാക്കാതെ ഗവർണർ തന്റെ വാഹനത്തിൽ നിന്ന് പുറത്തിറങ്ങി ഗിരീഷിന്റെ അടുത്തേക്ക് എത്തുകയായിരുന്നു.

വഴിയാത്രക്കാരന് ദേഹാസ്വാസ്ഥ്യം; സഹായവുമായി ഗവർണർ pic.twitter.com/b3J6ycfrT9

— Tatwamayi News (@TatwamayiNews) August 19, 2026

ഏകദേശം പതിനഞ്ച് നിമിഷത്തോളമാണ് ഗവർണർ സംഭവസ്ഥലത്ത് ചെലവഴിച്ചത്. റോഡിൽ വീണുകിടന്ന അദ്ദേഹത്തിന്റെ ആരോഗ്യനില നിരന്തരം പരിശോധിക്കുകയും ആവശ്യമായ അടിയന്തര സഹായങ്ങൾ ചെയ്തുനൽകാൻ തന്റെ സ്റ്റാഫിന് നിർദ്ദേശം നൽകുകയും ചെയ്തു. ഗവർണറുടെ നിർദ്ദേശപ്രകാരം സ്റ്റാഫ് ഉടൻ തന്നെ വെള്ളം എത്തിച്ച് നൽകുകയും മുഖം കഴുകിക്കൊടുക്കുകയും ചെയ്തു. തുടർന്ന് ഗിരീഷിന്റെ ഫോൺ ഉപയോഗിച്ച് കുടുംബാംഗങ്ങളെ ബന്ധപ്പെടാൻ ശ്രമിച്ചെങ്കിലും, വെള്ളയമ്പലത്ത് ആൾത്തറ ദേവീക്ഷേത്രത്തിന് സമീപമുള്ള കുടുംബാംഗങ്ങൾ സ്ഥലത്ത് എത്തുവാൻ വൈകുമെന്ന് മനസ്സിലായി.

തുടർന്ന് സ്ഥിതി ഗുരുതരമാകാതിരിക്കാൻ ഗിരീഷിനെ ഉടൻ തന്നെ ആശുപത്രിയിലേക്ക് മാറ്റി വിദഗ്ധ പരിശോധന ഉറപ്പാക്കണമെന്ന് ഗവർണർ കർശന നിർദ്ദേശം നൽകി. ഇതിനായുള്ള എല്ലാവിധ ക്രമീകരണങ്ങളും ഗവർണറുടെ നേതൃത്വത്തിലും സ്റ്റാഫിന്റെ സഹായത്തോടെയും വേഗത്തിൽ തന്നെ ഒരുക്കുകയും ചെയ്തു. തിരക്കിനിടയിലും സാധാരണക്കാരന്റെ ജീവന് പ്രാധാന്യം നൽകിയ ഗവർണറുടെ ഈ മാതൃകാപരമായ പ്രവൃത്തി നഗരവാസികൾക്കിടയിൽ വലിയ പ്രശംസയ്ക്കാണ് ഇടയാക്കിയിരിക്കുന്നത്.