വൻ ഭീകരാക്രമണ പദ്ധതി തകർത്ത് ഗുജറാത്ത് എടിഎസ് ! 3 ഭീകരർ അറസ്റ്റിൽ; പിടിയിലായത് ആയുധങ്ങൾ കൈമാറുന്നതിനിടെ

അഹമ്മദാബാദ് : രാജ്യത്തുടനീളം ഭീകരാക്രമണങ്ങൾ ആസൂത്രണം ചെയ്യാനും ആയുധങ്ങൾ വിതരണം ചെയ്യാനും ശ്രമിച്ച മൂന്ന് ഭീകരരെ ഗുജറാത്ത് ഭീകരവിരുദ്ധ സേന അഹമ്മദാബാദിൽ നിന്ന് അറസ്റ്റ് ചെയ്തു.

ഡോ. അഹമ്മദ് മൊഹിയുദ്ദീൻ സയ്യിദ്, മുഹമ്മദ് സുഹൈൽ, ആസാദ് എന്നിവരാണ് അറസ്റ്റിലായതെന്ന് ഉദ്യോഗസ്ഥർ അറിയിച്ചു. ഇവർ ഒരു വർഷമായി എടിഎസിന്റെ നിരീക്ഷണത്തിലായിരുന്നു. “ഗുജറാത്ത് എ.ടി.എസ്. മൂന്ന് പ്രതികളെ അറസ്റ്റ് ചെയ്തിട്ടുണ്ട്. കഴിഞ്ഞ ഒരു വർഷമായി ഇവരെ നിരീക്ഷിച്ചുവരികയായിരുന്നു, ആയുധങ്ങൾ കൈമാറുന്നതിനിടെയാണ് പിടികൂടിയത്. രാജ്യത്തിന്റെ വിവിധ ഭാഗങ്ങളിൽ ആക്രമണങ്ങൾ നടത്താൻ ഇവർ പദ്ധതിയിട്ടിരുന്നു,” ഏജൻസി പ്രസ്താവനയിൽ അറിയിച്ചു.

ഈ വർഷം ജനുവരിയിൽ, പാകിസ്ഥാനുമായി ബന്ധമുള്ള ഓൺലൈൻ ഭീകര മൊഡ്യൂൾ നടത്തിയതിന് പ്രതിയായ ഒരു സ്ത്രീയുൾപ്പെടെ ഇന്ത്യൻ ഉപഭൂഖണ്ഡത്തിലെ അൽ-ഖ്വയ്ദയുടെ (AQIS) അഞ്ച് അംഗങ്ങളെ ഗുജറാത്ത് എടിഎസ് അറസ്റ്റ് ചെയ്തിരുന്നു. അൽ-ഖ്വയ്ദയുമായി ബന്ധമുണ്ടെന്നാരോപിച്ച്, കേസിൽ നേരത്തെ അറസ്റ്റിലായ മറ്റ് മൂന്ന് പേരുമായി ബന്ധമുണ്ടായിരുന്ന 30 വയസ്സുകാരിയായ സാമ പർവീണിനെ എടിഎസ് ബംഗളൂരുവിൽ നിന്ന് കസ്റ്റഡിയിലെടുത്തിരുന്നു.

ജൂലൈ 23-ന് എക്യുഐഎസ്. ബന്ധമുള്ള നാല് ഭീകരരെ എടിഎസ് പിടികൂടി. മുഹമ്മദ് ഫായിഖ് (ഡൽഹി), മുഹമ്മദ് ഫർദീൻ (അഹമ്മദാബാദ്), സൈഫുള്ള ഖുറേഷി (മോദാസ, അരവല്ലി), സീഷാൻ അലി (നോയിഡ, ഉത്തർപ്രദേശ്) എന്നിവരായിരുന്നു അറസ്റ്റിലായത്.

എക്യുഐഎസ് ബന്ധം സംശയിച്ച് എല്ലാ പ്രതികളും നിരീക്ഷണത്തിലായിരുന്നു എന്നും, പ്രത്യേക ഇന്റലിജൻസ് വിവരങ്ങളുടെ അടിസ്ഥാനത്തിലുള്ള ഏകോപിത നടപടിയാണ് അറസ്റ്റുകൾക്ക് പിന്നിലെന്നും ഗുജറാത്ത് എടിഎസ് ഡിഐജി സുനിൽ ജോഷി സ്ഥിരീകരിച്ചു.